УИХ-ын ээлжит сонгуулийн жил айсуй. Дэлхийн ихэнх улс орон сонгуулийн холимог тогтолцоог хэрэглэж байна. Мажоритар тогтолцоо учир дутагдалтай гэдгийг судлаачид хэлдэг. Монгол Улс 2012 оны сонгуулиа холимог тогтолцоогоор явуулж, 2016 онд богино хугацаанд хууль баталж мажоритар тогтолцоогоор сонгуулиа явуулсны горыг хангалттай амссан. Тэгвэл ирэх оны Сонгуулийн хуулийг хэрхэн ямар зохицуулалтаар шийдвэрлэж, сонгуульдах нь тодорхойгүй байна. Иргэд улстөрийн боловсролгүй байх тусам авлига, хээл хахуульд автсан улстөрчдөд ашигтай байдал үүсдэг. Ядуу буурай орны зовлон л юм даа. Эдийн засгийн өсөлтгүй, иргэд нь ядуу, боловсрол, эрүүл мэндийн асуудал нь тартагтаа тулсан ийм улсыг түмпэн шанага, аяга тавагханаар хуурч, ядуу боловсролгүй чигээр нь байлгах бодлого ирэх жил үргэлжлэх эсэхийг харж л байя. Монгол Улсын Ерөнхийлөгч Х.Баттулга энэ асуудлыг цэгцлэх үүднээс Сонгуулийн хуульд нэмэлт өөрчлөлт оруулахаар болсон тухай Тамгын газрынх нь дарга З.Энхболд нийгмийн сүлжээнд “мэдээлж” байсан ч одоогоор сураг чимээ гараагүй байна. УИХ-ын гишүүд болон нэр дэвшигчид сонгогчиддоо элдэв хэрэглээний зүйл, бэлэг сэлт тараасаар ирсэн, цаашдаа ч тараах биз. Монгол Улсын хуулиар бэлэг тарааж болохгүй гэж хориглоогүй болохоор тийм.
Харин УИХ-ын ээлжит сонгуулийн жилийн нэгдүгээр сарын 1-нээс сонгууль явагдаж дуусталх зургаахан сарын хугацаанд тэвччих юм бол бусад үед сар шинийн баяр, наадам, бусад тэмдэглэлт баяр, иргэдтэй уулзахдаа юугаа тараах нь тэдний эрх болж таарна. Гэвч Сонгуулийн хуулиар сонгуулийн жил эхлэхээс өмнө тарааж болох бэлэг сэлт, эд бараа таваар, хүнс нь нэр дэвшигчид нэг гараанаас сонгуульд өрсөлдөх ёстой гэсэн үзэл санааг үгүй хийж байгаа юм. Ямар ч бизнесгүй мөнгөгүй гэж өөрийгөө тодорхойлдог Баасанхүү, 37 хувийн компанитай Чойжоо хоёр нэг тойрогт өрсөлдлөө гэж бодъё. Нэг нь ам хэлээрээ сонгогчдыг “панаалдаж” байхад нөгөөх нь хөрөнгө мөнгөөр дээрэлхэх хоёр газар тэнгэр шиг ялгаатай. Үүнд л сонгогчдын улстөрийн боловсрол нөлөөлнө. Хуулийн цоорхой иргэдэд ашиггүй, улстөрчдөд ингэж л ашигтайгаар үйлчилдэг.
Бэлэг сэлт тараах нь ч дүүрчээ гэж бодъё. Сонгуулийн өмнөх жилийн халуун зунаар эхэлдэг сурталчилгаа, пиарыг хэрхэн зохицуулах вэ. Сонгуулийн тухай хуулийн 29 дэх заалтад Сонгуулийн ерөнхий хороо болон тойргийн хороо нэр дэвшигчдийг бүртгэсэн тухай шийдвэр гаргана. Нэр дэвшигчийн үнэмлэх олгоно гэж заасан бол мөн хуулийн 35 дугаар зүйлд “Нам, эвсэл, нэр дэвшигч нь сонгуулийн сурталчилгаагаа энэ хуулийн 29.12, 29.13-т заасны дагуу нэр дэвшигч бүртгүүлж, үнэмлэх авсан өдрөөс эхлүүлнэ” гэж заасан байдаг. Тэгвэл яг энэ заалтыг, Сонгуулийн хуулийг зөрчсөн үйлдэл гарсаар байна. Сонгуульд нэр дэвшинэ гэдгээ мэдэгдсэн зарим нэг хурган дарга нар тойрогтоо уулзалт яриа хийх, үнэ төлбөргүй эмнэлгийн үйлчилгээ үзүүлэх зэргээр сурталчилгаагаа хийгээд эхэллээ.
Тэд Сонгуулийн тухай хуулийн 35.2-т нам, эвсэл, бие даан нэр дэвшигч нь сонгуулийн мөрийн хөтөлбөр, үзэл баримтлалаа тайлбарлан таниулах, нэр дэвшигчийг дэмжин сурталчлах ажлыг уулзалт, хурал, цуглаан хийх, ухуулах байр ажиллуулах, сонгуулийн сурталчилгааны самбар байрлуулах зэрэг хуулиар хориглоогүй арга хэлбэрээр зохион байгуулах эрхтэй” гэсэн заалтыг зөрчөөгүй гэж тайлбарлаж болно. Гэвч хуульд сонгуулийн жилийн нэгдүгээр сарын 1-нээс сурталчилгаа эхэлсэн байх ёстой гэсэн заалтыг зөрчиж байгаагаа мэдэж баймаар. Түүнчлэн мөн хуулийн 35.15-д зааснаар “сонгогчид мөнгө, эд бараа үнэгүй тараах, аливаа үйлчилгээг төлбөргүй болон хөнгөлөлттэйгөөр үзүүлэх, төлбөрт таавар, бооцоот, мөрийт тоглоом зохион байгуулах, биеийн тамирын уралдаан тэмцээн баяр наадам, урлагийн тоглолт зохион байгуулах, түүнийг ивээн тэтгэх, хүлээн авалт, дайллага, цайллага зэрэг сонгуулийн сурталчилгаатай холбогдсон олон нийтийг хамарсан арга хэмжээ зохион байгуулах, сонгогчдыг гадаад дотоодод аялал зохион байгуулж оролцуулах, амралт сувилалд амраах, хэвлэл мэдээллийн хэрэгсэл болон цахим хуудас ашиглан улс төрийн чансаа тогтоох зорилго бүхий аливаа хэлбэрийн шалгаруулалт зохион байгуулах, бусдыг гүтгэх доромжлох, хуурамч мэдээлэл тараах, ирээдүйд өөрийн болон бусдын хөрөнгөөр мөнгө, эд бараа өгөхөөр гэрээ байгуулах, аман хэлцэл хийх, хишиг, хувь, хувьцаа өгөх, ажлын байранд зуучлах, ажилд оруулах зэрэг амлалт авах, төрийн болон бусад өмчийн хөрөнгөөр хөрөнгө оруулалтын чанартай ажил үйлчилгээ явуулах, төлбөргүй эмнэлгийн үйлчилгээ үзүүлэх, эрүүл мэндийн үзлэг явуулахыг хориглоно” гэсэн байдаг. Тэгвэл яг энэ заалтуудыг зөрчсөн хэдхэн жишээг дор үзүүлье.
-Зам, тээвэр хөгжлийн сайдын зөвлөх Б.Цогтгэрэл ирэх сонгуульд Сэлэнгэ аймагт нэр дэвших тухай яриа гарсан нь худал биш бололтой. Тэрбээр тус аймгийн сонгогчдод зориулж эрүүл мэндийн үзлэг, лекц, үсчний үнэгүй үйлчилгээ үзүүлж, урлагийн тоглолт зохион байгуулахаар сурталчилгааны самбар гаргасан.
-УИХ-ын гишүүн Ж.Мөнхбат өөрийн сонгогдсон Архангай аймгийн гуравдугаар тойрог болох Архангай аймгийн Батцэнгэл, Өлзийт, Өгийнуур, Хашаат Хотонт, Хайрхан, Цэцэрлэг, Эрдэнэмандал сумын оюутнуудад зориулж Хан-Уул дүүрэгт оюутны дотуур байр барихаар есөн тэрбум төгрөгийг хоёр жил дараалан /2019 онд зургаан тэрбум, 2020 онд гурван тэрбум/ төсөвт суулгасан.
-Ulsturch.mn сайт “Шилдэг улстөрч 2020” нэртэй улстөрчдийн рейтинг тогтоох судалгаа явуулж, нэрсийн жагсаалт гаргасан /иймэрхүү судалгаа ихэвчлэн төлбөртэйгөөр явагддаг/.
-МАХН иргэдийг үнэгүй орон сууцанд хамруулах амлалт өгч, бүртгэж эхэлсэн.