УИХ-ын 73 дугаар тогтоолд тавьсан Ерөнхийлөгч хоригийг хүлээн авч, Үндсэн хуулийн гуравдугаар хэлэлцүүлгийг шууд үргэлжлүүлэхээр УИХ-аар шийдвэрлэсэн. Тэгвэл Үндсэн хуульд нэмэлт өөрчлөлт оруулах гуравдугаар хэлэлцүүлэг өнөөдөр эхлэх юм. Гуравдугаар хэлэлцүүлэгт бэлтгэж АН, МАН, Ерөнхийлөгч гэсэн гурвалсан хэсгээс бүрдсэн Ажлын хэсэг байгуулсан. Гуравдугаар хэлэлцүүлгийн үеэр хоёрдугаар хэлэлцүүлгээр унасан зарим саналыг гишүүдийн 3/2-оор дэмжвэл оруулж болно гэсэн заалтыг журмын хуульд оруулсан. АН-аас тавьж байгаа Ерөнхийлөгчийг парламентаас сонгох, сонгуулийн холимог тогтолцоог тусгаж өгөх, Ерөнхий сайдыг УИХ-аас томилж, бусад сайдуудыг гаднаас томилох асуудалд ажлын хэсэг саналаа нэгтгэсэн. Ямар ч байсан сонгуулийн тогтолцоо, хоёрдугаар хэлэлцүүлгийн үеэр унасан Ерөнхий сайдын эрх мэдлийн асуудал дахиж оруулж ирэх дээр МАН, АН, Ерөнхийлөгчийн талууд санал нэгджээ. Харин Ерөнхийлөгчийг парламентаас сонгох эсэх асуудал нээлттэй үлдсэн.