ҮЙЛ ЯВДЛЫН ТОВЧООН

Нийслэлийн ИТХ-ын ээлжит бус хуралдаан эхэллээ

Х.БОЛОР (сэтгүүлч)
2019-01-15

Нийслэлийн ИТХ-ын ээлжит бус VI хуралдаан 85 хувийн ирцтэй эхэллээ. Хуралдаанаар нийслэлийн Засаг дарга бөгөөд Улаанбаатар хотын захирагчийг томилуулах, томуу, томуу төст өвчний тархалтын талаар мэдээллийг сонсох, хурлын зохион байгуулалт зэрэг асуудлыг хэлэлцэх товтой байна.

Нийслэлийн Засаг дарга бөгөөд Улаанбаатар хотын захирагчид нэр дэвшүүлэх тухай асуудлыг нийслэлийн ИТХ дахь МАН-ын бүлгийн дарга Р.Дагва танилцуулсан юм. Нийслэлийн МАН-ын Тэргүүлэгчид нийслэлийн Засаг дарга бөгөөд Улаанбаатар хотын захирагчид нийслэлийн ИТХ-ын дарга С.Амарсайханы нэрийг дэвшүүлж, МАН-ын Удирдах зөвлөл 100 хувийн саналаар дэмжсэн. Тус тогтоолыг нийслэлийн ИТХ дахь МАН-ын дарга Р.Дагва уншиж, танилцуулсан юм. Нийслэлийн ИТХ-ын дарга С.Амарсайхан хотын даргад нэр дэвшиж буйтай холбогдуулан түүний санал болгосноор ээлжит бус VI хуралдааныг төлөөлөгч Б.Батнасан даргалан явуулж байна.

Хуралдааны үеэр нийслэлийн ИТХ-ын төлөөлөгч С.Мөнхчулуун өөрийн нэрийг нийслэлийн Засаг дарга бөгөөд Улаанбаатар хотын захирагчид  дэвшүүлэв. Үүнтэй холбогдуулан МАН-ын бүлгийн дарга Р.Дагва 30 минутын завсарлага  авах хүсэлт гаргасныг хүлээн авлаа.