Өмгөөлөгч М.Баасандоржтой холбогдож, “таван үг” солилоо.
-Сайн байна уу, УИХ-ын гишүүн Д.Гантулга чөлөөлөгдөх хүсэлтээ өгчихсөн. УИХ-ын чуулганы шийдвэрт Ерөнхийлөгч хориг тавьчихсан. Та энэ асуудалд ямар байр суурьтай байна вэ?
-Өөрөө чөлөөлөгдөх хүсэлтээ өгсөн. Энэ нь бусад шалтгаан гэдэгт орно гэж үзэх юм бол чөлөөлнө. Чөлөөлөхөд шалтгаан байх ёстой. 6.6.3 гэж яриад байгаа. Энэ нь өөр ажилд орсон эсвэл бусад хүндэтгэх шалтгааны улмаас өөрөө хүсэлтээ өгсөн бол чөлөөлнө гэж байгаа.
-Д.Гантулга гишүүний хувьд чөлөөлөх хүсэлтдээ шалтгаанаа бичээгүй шүү дээ?
-Тийм байна лээ. Өөр ажилд шилжээгүй нь ойлгомжтой. Бусад хүндэтгэн үзэх шалтгаанд орох уу, үгүй юу гэдгийг УИХ-аас шийдвэрлэнэ.
-УИХ-ын чуулганаар хэлэлцээд олонхийн саналаар хэвээр үлдээчихвэл яах вэ?
-Чөлөөлөгдөх хүсэлтийг нь хэлэлцээд олонхийн саналаар хэвээр нь үлдээчих боломжтой. Гэм буруутай юу, үгүй юу гэдгийг шүүх тогтооно. Шүүх эцсийн шийдвэрийг гаргана. Чөлөөлөгдөх хүсэлтийг нь УИХ-аар шийдвэрлээд, шүүхээр гэм буруугүй гэж тогтоосон ч буцаад УИХ-ын гишүүн болж болохгүй. Харин түдгэлзүүлсэн тохиолдолд ийм шийдвэр гарвал болно гэсэн үг.
-Хохирогчийн зүгээс шинэ баримт нотолгоо гарсан уу?
-Бид энэ талаар мэдээлэл өгөх ямар ч боломжгүй.