Онцгой байдлын ерөнхий газрын дарга, хошууч генерал Т.Бадрал, тус газрын дэд дарга, бригадын генерал Г.Арвинбуян тэргүүтэй албан тушаалтнуудад холбогдох хэргийг Авлигатай тэмцэх газар шалгаж байлаа. Тэгвэл хэргийг АТГ шалгаж дуусаад, хөрөнгө завшсан найман үйлдэл нь тогтоогдсон гэж үзсэн талаар зарим хэвлэл мэдээлэв. АТГ-ын Урьдчилан сэргийлэх, соён гэгээрүүлэх хэлтсийн дарга, эрхэлсэн комиссар Т.Баярхүүгээс энэ талаар тодруулахад “Найман үйлдэл гэдгийг нь мэдэхгүй. Манайх буруутай, буруугүйг тогтоодог газар биш. Ямар ч байсан тэдэнд холбогдох хэргийг шалгаад, шүүхэд шилжүүлэх саналтайгаар прокурорт шилжүүлсэн”.
Т.Бадрал генерал өөрөө дөрөвдүгээр сарын 30-ны өдөр хэвлэлд “Хөгжлийн банкны зээлээр ОБЕГ тоног төхөөрөмж авсан. Тоног төхөөрөмжийг үнэтэй авсан гэсэн асуудал яригдсан. Би тоног төхөөрөмж авсныг зөв гэж бодож байгаа” хэмээжээ. Тэгвэл АТГ шалгаад, прокурорт шилжүүлчихэж. Шүүхэд шилжүүлэх саналтайгаар шүү. Онцгой байдлынханд машин, тоног төхөөрөмж, хувцас хэрэглэл гээд юу эс хэрэгтэй байгаа билээ. Гал сөнөөгчид, аврагчид бүрэн бус техник хэрэгсэлтэй, дэгсдүүлсэн хүнд улаан гараараа, махан биеэрээ л аюулын өөдөөс сөрж байгаа. Гэтэл удирдаж байгаа дарга нь иргэдийн аюулгүй байдлын төлөө амь хайргүй тэмцэж байгаа аврагчид, гал сөнөөгчиддөө хэдэн тоног төхөөрөмж авахдаа дундаас мөнгө хумсалсан хэргээр шалгуулж байх юм.
Зарим хэвлэлийн мэдээлснээр найзынхаа компанийг автомашин нийлүүлэх тендерт шалгаруулж, 2.1 тэрбумын илүү үнээр 15 “Газель” машин авсан гэх. Хаа байсан 1988 оны хуучин машин нийлүүлсэн. Зарим хэрэглэл, тоног төхөөрөмжийг сонгон шалгаруулалт зарлалгүй авсан хэрэгт ОБЕГ-ын дарга нарыг буруутгасан гэж бичжээ. Шүүх үнэн мөнийг нь тогтоож, хэрэг үйлдсэн гэж үзвэл ялаа оноогоод, үгүй бол цагаатгах байх. Гэхдээ ОБЕГ-ын дарга нар ийм хэрэгт нэр холбогдож, АТГ-аар шалгуулаад явж байна гэдэг нь өөрөө гутамшиг. Онцгой байдлын “онцгүй” дарга юм даа, та.