Т.Тулга олимпын эрхээ авч, Г.Мандахнаран, Д.Хүдэрбулга нар ялагдлаа

Н.ПУНЦАГБОЛД (сэтгүүлч)
2019-09-20

Чөлөөт  бөхийн ДАШТ үргэлжилж байгаа билээ.  Эрэгтэйчүүдийн 65 кг-ын жинд зодоглосон  ОУХМ Т.Тулга дагах барилдаанаа 2018 оны цэргийн ДАШТ-ий мөнгөн медальт Германы Александр Семисоровтой хийж 8:0-ээр яллаа.  Ийнхүү Т.Тулга Монголын чөлөөт бөхийн тамирчдаас “Токио-2020” зуны олимпийн их наадмын анхны эрхийг авчирч байна. Тэрбээр 20:00 цагт ДАШТ-ий мөнгө, хүрэл медальт, Азийн наадам болон Азийн аварга Энэтхэгийн Бажранг Пуньятай хүрэл медалийн төлөө барилдана.

Тэгвэл  эрэгтэйчүүдийн 70 кг-ын жинд зодоглосон  ДАШТ-ий хошой хүрэл медальт, гавьяат тамирчин Г.Мандахнаран эхний барилдаанаа  Польшийн дагестан легионер Магомедмурад Гажиевтэй хийж,  4:2-оор ялагдлаа. Манай бөхөд дагах боломж бий. 

Мөн 125 кг-д зодоглосон Д.Хүдэрбулга эхний тойрогтоо Азийн хошой аварга Ираны Ядоллах Мохебитэй хүч үзэж 6:1-ээр ялагдсан юм. Одоо тэрбээр Мохебитийг финалд шалгарах боломжийг хүлээх л үлдлээ.