Эрүүл мэндийн яамнаас коронавирустэй холбоотой цаг үеийн асуудлаар өчигдөр мэдээлэл хийлээ. Өчигдөр буюу нэгдүгээр сарын 28-ны өдрийн 11:00 цагийн байдлаар дэлхий дахинд 4474 хүн шинэ төрлийн коронавирусээр өвчилж, 106 хүн нас баржээ. Өвчилсөн хүмүүсийн 4439 нь БНХАУ-д илэрсэн аж. ЭМЯ-ны Төрийн захиргааны удирдлагын газрын дарга Б.Цогтбаатар хэлэхдээ, “Монгол Улсад шинэ коронавирусын халдвар бүртгэгдээгүй байна. Нэгдүгээр сарын 9-27-ны хооронд Халдварт өвчин судлалын үндэсний төвд нийт 13 хүнээс шинжилгээ авсан. Эдгээр иргэд нь БНХАУ-аас ирсэн, халуурсан иргэд байсан. Эдгээрийн дөрвөөс нь томуугийн А хүрээний вирус илэрсэн. Архангай болон Ховд аймагт сэжигтэй тохиолдол бүртгэгдсэн ч үгүйсгэсэн. Халуурсан, уушгины хатгалгаа туссан, хатгалгааны улмаас нас барсан тохиолдлыг шалгасаар байгаа. Хонгконгоос ирсэн хоёр оюутан болон Өмнөговь, Булган, Хэнтий аймагт гарсан сэжигтэй тохиолдлуудаас шинжилгээ авсан бөгөөд хариу гарахаар дахин мэдээлнэ. Гадаад харилцааны яам Хятадын Үхань хотод байгаа оюутнуудаа авчрах хүсэлтийг тус улсын Гадаад харилцааны яаманд албан ёсоор хүргүүлсэн. Ийм хүсэлтийг өөр 10 орон тавиад байгаа юм билээ. БНХАУ нь эрүүл мэндийн үзлэг хийж, аюулгүй байдлыг хангаад зөвшөөрөл өгөхөө илэрхийлсэн” гэв. Шинэ коронавирусын оношлуурыг ХӨСҮТ-д Томуугийн лавлагаа лабораторид ашиглаж байгаа аж.
Уушгины хатгалгаагаар нас барсан болон өвчилсөн тохиолдлуудыг шалгахад 2019 оны сүүлийн мэдээллээр 78 мянга 141 хүн хэвтэн эмчлүүлсэн. Харин уушгины хатгалгаа өвчнөөр 431 хүн нас барсан гэдгийг онцоллоо.
Маскны эрэлтээ хангаж гүйцэхгүй байгаа учраас зохиомол үнийн хөөргөдөл үүсгэх хандлагатай байгааг онцлоод, Шударга өрсөлдөөн хэрэглэгчийн төлөө газрын 18001284 дугаарын утсанд мэдээлэл, гомдол өгөх боломжтой гэлээ. Эм ханган нийлүүлэх байгууллагууд нь эхний ээлжид 45-60 хоногийн нөөц бүрдүүлдэг аж. “Мөнхийн тун”, “Монхимо” зэрэг газрууд дотооддоо маск үйлдвэрлэдэг. “Мөнхийн тун” нь хоногт 42 мянган маск үйлдвэрлэх хүчин чадалтай, “Монхимо” нь 30 мянган ширхэг маск үйлдвэрлэх хүчин чадалтай гэдгийг мөн хэллээ.
Австралийг зорьсон монгол иргэнээс коронавирус илрээгүй
Мөн өдрийн 13:00 цагийн үед коронавирусын асуудлаар дахин мэдээлэл хийж, Австралид монгол иргэн шинэ төрлийн коронавирусээр өвчилсөн талаар зарласан юм. Б.Цогтбаатар дарга хэлэхдээ, “2020 оны нэгдүгээр сарын 19-нд Австралийн Мельбурнд очсон 34 настай монгол иргэнээс шинэ коронавирусын халдвар илэрчээ. Тус хотод очсон шөнөөсөө халуурсан бөгөөд эмнэлэгт тусгаарлагдан эмчлүүлж байгаа. Шинэ төрлийн коронавирус гэдэг нь нэгдүгээр сарын 25-нд лабораторийн шинжилгээгээр баталгаажсан” гэж байсан ч удалгүй 16:30 минутын орчимд дахин мэдээлэл хийсэн юм. Уг мэдээлэлд, “Австралийн Эрүүл мэндийн газартай холбогдож мэдээллийг нягтлахад тухайн Монгол Улсын иргэн онгоцонд байсан халдвар авсан хятад иргэнтэй хамт нисэж очсон бөгөөд Монгол Улсын иргэн шинэ коронавирусын халдвар аваагүй байна” гэдгийг хэллээ.
Говьсүмбэр аймагт халуурсны улмаас нас бараагүй гэв
Говьсүмбэр аймагт нэг иргэн өндөр халуурсны улмаас нас барсан талаарх мэдээлэл гарч буй. Энэ асуудлыг Говьсүмбэр аймгийн Засаг даргын орлогч Ш.Билэггүмбэрэлээс тодруулахад, “Манай аймагт халуурч, хатгалгаа туссан болон ханиад томуугийн шинж тэмдгээр нас барсан тохиолдол өнөөдрийн байдлаар гараагүй. Коронавирусын сэжигтэй тохиолдол ч бүтгэгдээгүй байна. Тиймээс ташаа мэдээлэл учраас худал мэдээлэл тараасан газруудыг шүүх байгууллагад өгнө” гэлээ.
Хэнтий аймагт нас барсан охины онош тодроогүй байна
Хэнтий аймгийн Нэгдсэн эмнэлэгт хөл хорио тогтоосонтой холбоотойгоор урсгал чиглэлүүдийг өөрчилж, байнгын постууд ажиллуулан, орох гарах хөдөлгөөнд хязгаарлалт хийж, талийгаачийн онош тодортол үйл ажиллагаа явуулж байгаа эмч, эмнэлгийн ажилчдын хөдөлгөөнийг 72 цагийн дотор гарах, орох хөдөлгөөнийг хязгаарлажээ. Тиймээс гаднаас зөвхөн эргэлт оруулж байгаа аж. Нэгдүгээр сарын 27-ны өглөө 13 настай Н өндөр халуурсан байдалтай Нэгдсэн эмнэлэгт хүргэгдэж, Сэхээн амьдруулах тасагт эрчимт эмчилгээ хийлгэж байгаад өдрийн 16:00 цагийн үед нас барсан золгүй явдал гарсан. Талийгаачийг коронавирусын халдвар авсан байж болзошгүй гэх хардлага үүссэн учраас сорьц авч Халдварт өвчин судлалын үндэсний төв рүү явуулсан аж. Сорьцын хариу 72 цагийн дараа гарна гэдгийг албаны эх сурвалж мэдэгдэж байна. Хэнтий аймгийн хэмжээнд томуу, томуу төст өвчний дэгдэлт 16.2 хувь буюу улсын дундажтай ойролцоо байгаа аж.
Нэг оношлуурыг нэг л удаа ашиглана
Нөхцөл байдалтай холбогдуулан мэргэжлийн хяналтын байгууллага өндөржүүлсэн байдалд ажиллаж байгаа аж. Хилийн бүсэд 450 байцаагч ажиллаж байгаагаас 100 гаруй нь эрүүл ахуйн байцаагчид байгаа юм байна. Хэвлэлийн хурлын дараа ЭМЯ-ны Төрийн захиргааны удирдлагын газрын дарга Б.Цогтбаатараас сэтгүүлчид дараах асуултаар хариулт авлаа.
-200 оношлуурын тоог цаашид нэмэх үү. Мөн Япон улс руу хариуг нь илгээж байж, оношоо баталгаажуулна гэсэн үг үү?
-Нэг оношлуурыг нэг удаа л ашиглах бөгөөд одоогоор зөвхөн ХӨСҮТ-д ашиглаж байна. Ямар ч өвчний үед оношийн баталгаажилтыг эцэслэхэд ганцхан лабораторийн шинжилгээгээр хийхгүй. Олон улсын итгэмжлэгдсэн лабораторид шилжүүлж байж, эцсийн оношийг баталгаажуулдаг учраас тэр дүрмээ дагана. Цаашид оношлуурын тоог нэмэх талаар Засгийн газар арга хэмжээ авна. Оношлуурын хариу 24-48 цагийн дараа гардаг бөгөөд эцсийн оношийг Японы тал гаргах юм.
-Монголд 13 эрсдэлтэй тохиолдлыг үгүйсгэлээ гэж мэдээллээ. Оношлуур нь 27-ны өдөр ирсэн байхад шууд үгүйсгэж болох юм уу?
-Дээрх 13 тохиолдлыг нэгдүгээр сарын 9-27-нд үгүйсгэсэн байгаа. Энэ нь өвчтөний бие сайжирсан, эсвэл лабораторийн шинжилгээгээр 22 үүсгэгч илрээгүй гэсэн үг.