ХУРААХ

ҮЙЛ ЯВДЛЫН ТОВЧООН

Монгол Улсын нийт хүн ам

Б.Насантогтох: Эрчим хүчний үйлчилгээг цахимаар авах боломжтой

Д.ОЮУН-ЭРДЭНЭ (сэтгүүлч)
2020-03-19

Засгийн газрын өчигдрийн ээлжит хуралдаанаар эрчим хүчний зарим  дүрмийг шинэчлэн баталлаа. Энэ  талаар Эрчим хүчний яамны Эрчим хүч, Түлшний бодлогын хэрэгжилтийг зохицуулах газрын дарга Б.Насантогтохоос тодрууллаа. 

-Цахилгаан эрчим хүч­тэй холбоотой ямар дүрмүүдийг шинэчилсэн бэ? 
-Засгийн газрын хурал­даа­наар Цахилгаан, дулааны эрчим хүч хэрэглэх дүрэм, Эрчим хүчний шугам сүл­жээ­ний хамгаалах дүрмийг шинэч­лэн баталлаа. Эд­гээр дүрмүүдэд 2001 оноос хойш шинэчлэл хийгээгүй бай­сан. Энэ нь эрчим хүчээр хангагч байгууллага болон хэ­рэг­­лэг­­чийн харилцааг зохи­­цуул­сан дүрэм юм. Ялан­­гуяа хэрэглэгчтэй хол­­боо­той томоохон заалтуудыг шинэ­чилсэн. Хэрэг­лэгч­дийн хамгийн их хүсэлт тавьдаг асуудал нь эрчим хүч хэрэглэхтэй хол­боо­той техникийн нөхцлийн асууд­луудыг энд тусгасан.  Техникийн нөхцөл гэдэг нь эрчим хүч авах, холболт авах зөвшөөрөл юм. Өөрөөр хэлбэл, хэрэглэгчийн хүсэлт, саналыг 100 хувь цахимаар авдаг болсон.  Мөн хэрэглэгч хүсэлт гаргасныхаа дараа хийж байгаа тооцооллыг цахимаар бүрэн хянах боломжтой системийг нэвт­рүүл­сэн. Үүнийг батал­гаа­жуул­сан дүрмийг  баталлаа.  Хоёрдугаарт, шугам сүл­жээг хамгаалах дүрмийг шинэ­чил­сэн. Тухайн хэрэглэгч төв суурин газрын шугамын зурваст зөвшөөрөлгүйгээр шууд хашаа хатгах, шугамын трасст өөрчлөлт оруулах зэргээр хүндрэл учруулдаг. Ингэж хүндрэл учруулсан хэрэглэгчийг эрчим хүчээр хангахгүй байх заалтыг тусгасан. Эрчим хүчээр хангагч, хэрэглэгч хоёрын бүх харилцаа цахим болсон гэдгийг онцлон хэлье.  Хэрэглэгч бүх бичиг баримтаа онлайнаар бөглөсний дараа тооцооллын хариунууд нь гарна. Ингэснээр төрийн үйлчилгээ хүний оролцоо­гүй­гээр, хурдан шуурхай болох юм.

-Эрчим хүч хэрэглэж байгаа хүн бүр  санал, гомдол, хүсэлтээ  заавал цахимаар өгнө гэсэн үг үү?
-Эрчим хүч хэрэглэж байгаа хэрэглэгчийн санал хүсэлт ямар ч нөхцөлд нээлттэй. Өмнө нь утсаар болон цахимаар авч байсан, одоо ч хэвээр. Харин эрчим хүч хэрэглэх,  техникийн нөхцөл хүссэн асуудал гарвал  www.dulaan.mn, www.tog.mn  сайтуудад хэрэглэгч онлайнаар баримтаа бөглөөд  бүрдүүлж өгнө. Өмнө нь цаасаар гарын үсэг зуруулах, бүрдүүлэх зүйлс дутуугаас болж эргэж буцах,  хангагч байгууллагад  иргэн өөрөө очиж материалаа өгөх, Эрчим хүчний яаманд очиж өгдөг  байсныг шинэ шатанд оруулсан гэсэн үг.   Энэ дүрмийн бас нэг онцлог нь явцыг иргэн өөрөө хянадаг болсон. Өөрөөр хэлбэл, миний гаргасан хүсэлт ямар явцтай байна, тооцоо нь хаана, хэнд байгаа вэ гэдгийг өөрийнхөө нууц үгээр ороод  хянах боломжтой.  Хэрэглэгч талдаа илүү хялбар болсон гэсэн үг. 

-Цахилгааны үнэ тариф­тай холбоотой шинэч­лэгдсэн зүйл байгаа юу?
-Үнэ тарифтай холбоотой шийдлүүд гараагүй. Дүрмийн шинэчлэлтэй холбоотой үйлчилгээ гарсан. 

-Дээрх дүрмүүд  аж ахуйн нэгжид ихэвчлэн хамаарах уу?
-Айл өрх, аж ахуйн нэгж аль аль нь хамаарна. Эрчим хүч хэрэглэж байгаа,  хэрэглэх хүсэлт гаргасан ямар ч хэрэглэгч хандаж болно гэж ойлгох хэрэгтэй.  

-Орон сууцаа зарсан то­хиолдолд хэрэг­лэг­чийн­хээ нэрийг цахимаар сольж болох уу?
-Хэрэглэгчийн кодоо­роо ту­хайн хангагч бай­гуул­лагадаа хүсэл­тээ гаргана. Иргэд хэрэг­лэг­чийнхээ кодоор  билл буюу тооцооны хуудсаа авдаг шүү дээ. Орон сууцаа зарахдаа ийм төл­бөр­тэй байгаа гэдгээ хавсар­гадаг. Түүнийг нь худал­дан авч буй хүн  буцаагаад тодруулдаг байдлыг ч мөн  онлайнаар шийдээд явах боломжтой. 

-Өмнө нь  хэд  хоногт  шийдэгддэг байсан юм бол. Одоо онлайнаар бөглөж,  шаард­лагатай бичиг барим­таа бүрдүүлэхээр хэ­дий хэр хугацаанд асууд­лаа шийднэ гэсэн үг вэ?
-Хоёр дахин багасаж байгаа. Өмнө нь нэг сарын хугацаанд байсан бол одоо 14 хоногт болсон.

-Хамгийн хурдандаа хэд хоног байх вэ?
-Тухайн хүсэлт гаргасан хуулийн  этгээд,  иргэний хүсэлт­тэй холбоотой байр­шил, горимын тооцоог хам­гийн ихдээ 14 хоног гэж тооцож байгаа бол, түүнээс бага нь гурав хоног гэж тооцсон.