Эрүүл мэндийн яамнаас ээлжит мэдээллээ өглөө. Энэүеэр ХӨСҮТ-ийн ерөнхий захирал Д.Нямхүү тусгаарлагдаж буй иргэдийн шинжилгээний хариу болон, эмчилгээний талаар танилцууллаа.
Тэрбээр хэлэхдээ, "Өчигдөр буюу зургаадугаар сарын 6-нд ХӨСҮТ-ийн хоёр лаборатори, Дархан-Уул аймгийн салбар лабораторид нийт 217 хүнд шинжилгээ хийхэд коронавирусийн халдвар илрээгүй.
Тодруулбал,
- ажиглах байранд байсан 185 хүний давтан шинжилгээнд коронавирус илрээгүй. Үүнд тавдугаар сарын 19-нд Энэтхэгээс ирсэн хүмүүс голчлон хамрагдсан.
- Мөн ХӨСҮТ-д тусгаарлагдсан 4 хүний давтан шинжилгээ,
- Тандалтын зорилгоор гурван хүнд шинжилгээ хийхэд коронавирус илрээгүй. /ХУД-ийн эмнэлэг, УНТЭ, өрхийн эрүүл мэндийн төвөөс авсан/
- Алтанбулаг боомтоор орж ирсэн ачаа тээврийн 25 жолоочид шинжилгээ хийхэд коронавирусийн халдвар илрээгүй.
Өнөөдөр 4 хүн эдгэрч, ХӨСҮТ-өөс гарсан бөгөөд нийт батлагдсан 193 тохиолдол байгаагаас 75 нь эдгэрч гарлаа" гэв.