УИХ-ын чуулганы нэгдсэн хуралдаанаар Монгол Улс, Олон улсын сэргээн босголт, хөгжлийн банк хоорондын зээлийн хэлэлцээр, Улаанбаатар хотын тогтвортой авто зам, тээвэр төслийг батлах эсэх асуудлыг хэлэлцэж байна. 

Энэ үеэр Нийслэлийн Засаг дарга бөгөөд Улаанбаатар хотын Захирагч Д.Сумьяабазар "Нийслэл хотын бүтээн байгуулалтад гадны нэмэлт эх үүсвэрийг зохицуулж оруулах зайлшгүй шаардлага үүсээд байна. Хэдий томоохон төсөл хөтөлбөрүүдийг хэрэгжүүлэх төлөвлөгөөтэй ажиллаж байгаа ч зам сайжруулах, засах, өргөтгөх, нэмэх асуудалд хүү багатай урт хугацааны зээл авах шаардлагатай болсон.

Дэлхийн банкны зээлийн эх үүсвэрийг Сангийн яамтай зөвшилцөж, Дэлхийн банкныхантай хэд хэдэн уулзалт хийж байж оруулж ирж байгаа. 60 орчим километр замыг Дэлхийн банкны эх үүсвэрээр хийснээр төсөвт дарамт учрахгүй, Улаанбаатар хотын төсөвт хөнгөлөлттэй юм. Гэхдээ энэ хаанаа ч хүрэхгүй. Бидний гаргасан тооцоо судалгаагаар Улаанбаатар хотын бүтээн байгуулалтад 9.7 их наяд төгрөгийн санхүүжилт хэрэгтэй.

Энэ эх үүсвэрээр нийслэлийн зам гүүр, инженерийн байгууламж, дулаан хангамжийн асуудал, гүүрэн байгууламж, ногоон байгууламж, орон сууцны хороолол, түүнийг холбосон дэд бүтцүүдийг шийдэх боломжтой. Улаанбаатар хотын түгжрэлийг зөвхөн зам бариад шийднэ гэдэг бол өрөөсгөл. Үүнийг олон талаас нь харж тооцож шийднэ.

Улаанбаатар хотод жилд 35 мянган хүн нэмэгдэж байгаа юм. Жилд 80 мянган тээврийн хэрэгсэлд хотын хөдөлгөөнд оролцохоор нэмэгддэг. Буруу талдаа рультэй автомашиныг хэрхэн яаж уялдаа холбоотой явуулах уу гэдгийг УИХ-тай хэлэлцэнэ. Хотын даац 800 мянга байх ёстой ч одоогийн байдлаар хоёр дахин нэмэгдсэн. Замын ачаалал даацаа дийлэхгүй байгаа учир түгжирнэ. Тийм учраас уялдаа холбоотой, тооцоотой урт хугацааны бодлого хэрэгжүүлнэ" гэлээ.