ХУРААХ

ҮЙЛ ЯВДЛЫН ТОВЧООН

Монгол Улсын нийт хүн ам

Ж.Сандагсүрэн: Шилдэг дөрвөн багшийг 10 сая төгрөгөөр урамшуулна

Б.ӨНӨРТОГТОХ (сэтгүүлч)
2018-12-03

Ерөнхий боловсролын сургуулийн төгсөгчид их, дээд сургуульд орохын тулд элсэлтийн ерөнхий шалгалт өгч, шалгалтын онооноосоо хамааран сургуулиа сонгодог. Сонгинохайрхан дүүргийн төгсөгчид уг шалгалтын оноогоор төдийлөн дээгүүрт жагсдаггүй нь сүүлийн жилүүдэд нийслэлийн хэмжээнд 6, 7-р байруудад жагссан үзүүлэлтээс харагдаж бйгаа юм.

Энэ нь нэг талаас сурагчдын сурлагын чанартай холбоотой мэт боловч өргөн утгаар нь авч үзвэл сургалтын орчин, багш нарын чадавх, эцэг эхийн дэмжлэг зэрэг маш олон хүчин зүйлээс хамааралтай. Эдгээр асуудлуудыг шийдвэрлэж, ерөнхий боловсролын сургуулиа төгсөж буй хүүхдүүдэд цаашид чанартай их, дээд сургуульд хүссэн мэргэжлээрээ элсэхэд нь туслах үүднээс дүүргийн удирдлагууд боловсролыг дэмжих дэд хөтөлбөрийн хүрээнд “UP” төслийг эхлүүлж, төслийн танилцуулгыг хийлээ.

Цаашид жил бүр тогтмол хэрэгжих уг төслийн нээлтэд 1500 орчим сурагч, сургуулиудын захирал, багш нар мөн сурагчдын эцэг эхийн төлөөлөл ирж, төслийн талаарх мэдээлэл, дүүргийн зүгээс төслөөр дамжуулан хүүхдүүдэд ямар боломж олгож байгаа мөн эцэг, эхчүүд юун дээр анхаарах ёстойг хэлэлцсэн юм. Төслийн танилцуулгын үеэр Засаг дарга Ж.Сандагсүрэн “Бид Сант, Олонлог зэрэг хувийн сургуулиудын багш нартай хамтран ажиллана. Дүүргийн дөрвөн бүсэд сонгоны анги хичээллүүлнэ. Хамгийн гол нь хүүхдүүд өөрсдөө хичээх хэрэгтэй. Мөн бид багш нарынхаа чадавхийг дээшлүүлэх хөтөлбөр хэрэгжүүлж байна.

Жил бүр багш нар руу чиглэсэн сургалт семинарыг хувийн болон улсын томоохон сургуулиудтай хамтран зохион байгуулна. ЭЕШ-ын оноогоороо тэргүүлсэн сурагчдаа бид гадны тэтгэлэгт хөтөлбөрт хамруулна. Түүнчлэн сайн ажилласан, хүүхдүүдийнхээ оноог дээшлүүлсэн багш нартаа мөнгөн урамшуулал олгоно. Тухайлбал, шилдэг дөрвөн багшид тус бүр 10 сая төгрөг, 10 багшид тус бүр хоёр сая төгрөг, 10 сургуулийг тус бүр зургаан сая төгрөгөөр урамшуулна. Энэ бол ирээдүйн боловсон хүчин хүүхдүүдэд оруулж буй хөрөнгө оруулалт юм” хэмээлээ.  Харин тус дүүргээс УИХ-д сонгогдсон гишүүн Х.Нямбаатар Тайванийн их, дээд сургуулиудад хүүхдүүдийг тэтгэлгээр сургах боломж байгаа талаар танилцуулга хийсэн юм.