ХУРААХ

ҮЙЛ ЯВДЛЫН ТОВЧООН

Монгол Улсын нийт хүн ам

Ч.Нямцэцэг: Гадаад паспортны хэвлэлт хэвийн болсон

Д.ОЮУН-ЭРДЭНЭ (сэтгүүлч)
2019-03-18

Өнөөдрийн байдлаар иргэний үнэмлэх, гадаад паспортын онлайн захиалга эхлээгүй байна. Харин хүлээн авах програм хангамж болон бэлтгэл ажлыг бүрэн хангажээ. Онлайн захиалга хэзээ эхлэх болон, ямар давуу талтай талаар УБЕГ-ын ахлах мэргэжилтэн Ч.Нямцэцэгээс тодрууллаа 

-Гадаад паспортын хэв­лэлт удааширч, иргэдэд багагүй хүндрэл учирсан.  Хэвлэх ажиллагаа хэвийн болсон уу? 
-Гадаад паспорт хэвлэх машинд  эвдрэл гэмтэл гарсан зүйл байхгүй. Гэхдээ гадаад  паспортын хэвлэлт буюу ир­гэдэд олголт хугацааны хувьд удааширсан нь үнэн. Удаа­ширсан шалтгаан нь  гурав­дугаар сард улсын бүрт­гэлийн байгууллагаас иргэдэд  төрийн үйлчилгээг шуурхай чирэгдэлгүй хүргэхийн тулд гадаад паспорт,  иргэний цахим үнэмлэхийг онлайнаар захиа­лах ажлыг төлөвлөн, тур­шил­тын ажлыг эхлүүлсэн юм. Үүнтэй холбоотой програмын шинэчлэл буюу системд өөрчлөлт хийсэн учраас удааширсан. Өнгөрсөн амралтын өдрүүдэд хүлээгдэж байсан гадаад паспортын хэвлэх үйл ажиллагааг хэвэнд нь орууллаа. Өнөөдрийн байд­лаар хэвийн ядагдаж байна. 

-Гадаад паспорт, иргэ­ний цахим үнэмлэхийг онлайнаар за­хиалахтай хол­богдуулаад тур­шилтын ажил хийсэн гэ­лээ. Яг хэзээнээс жигдрэх вэ? 
-Хамгийн  энгийнээр  хэлэхэд амьдарч буй газраасаа гэрээсээ,  ажлаасаа онлайнаар  захиалгаа өгөх бо­ломж­той гэж ойлгож болно. Энэ долоо хоногоос ир­гэний цахим үнэмлэхний онлайн захиалгыг хүлээж авна. Харин гуравдугаар сарын сүүлээр гадаад паспортын онлайн захиалгыг хүлээж авахаар төлөвлөж байна. Эхний ээлжинд иргэний цахим үнэмлэхний онлайн захиалгыг авахдаа хаяж үргэдүүлсэн иргэдийн захиалгыг хүлээж авна.  Өөрөөр хэлбэл 25 болон 45  насны сунгалтыг өөрсдийн харьяа дүүрэгт хүлээж авах юм.  УБЕГ-аас иргэний цахим үнэмлэхний захиалга хүлээж авахдаа иргэдэд хэвлэл мэ­дээллийн  байгууллагаар дам­жуулан мэдээлэх юм.  Ингэх­дээ иргэд хаанаас хэрхэн ямар байдлаар  захиалах талаар нэгдсэн мэдээлэл хүргэнэ. Гадаадад байгаа хүмүүстээ ч мөн  хэрхэн  хаана хандаж захиалах талаархи мэдээллийг  дэлгэрэнгүй  хүргэнэ. 

-Цахим хэлбэрт шилжсэн лавлагааг тодруулахгүй юу?
-Улсын бүртгэлийн багц хууль 2018 оны 11 сарын 1-нээс хэрэгжиж эхэлсэн. Үүнтэй хол­боотойгоор burtgel.mn цахим системийг нэвтрүүлж эхэлсэн. Тус цахим системээс иргэд цаг хугацаа орон зайнаас үл хамааран өнөөдрийн байдлаар 23 төрлийн лавлагаа мэдээллийг шууд авах боломжтой болсон.Хууль хэрэгжих үед 10 төрлийг олгож байсан бол энэ тоог үе шаттай нэмэгдүүлсээр 23 болгоод бна.Цаашид энэ тоог нэмэг­дүүлэх, үйлчилгээг шуур­хай хүргэх зорилт тавин ажил­лаж байна. Тодруулбал, регистрийн дугаар сольж,  шинээр олгосон  тухай, гадаад паспорт дахин  болон шинээр авсан, гадаад паспорт огт авч байгаагүй тухай, хуулийн этгээдийн үүсгэн байгуулагч, хувьцаа эзэмшигчийн тухай, цахим үнэмлэх, оршин суугаа хаяг, төрсний бүртгэл, гэрлэсэн эсэх, гэрлэлт дуусгавар болсныг бүртгүүлсэн тухай, хуулийн этгээдийн дэлгэрэнгүй гэх мэт лавлагааг цахимаар олгож байна.   

-Хууль хэрэгжиж эхэлснээр ямар үйлчилгээнүүдэд өөрч­лөлт орсон бэ?
-Хуулийн гол зохицуулалт нь онлайн үйлчилгээг түлхүү нэвтрүүлэх юм. Хэд хэдэн үйлчилгээний шат дамжлагыг буу­руулсан. Тухайлбал, шил­жилт хөдөлгөөнийг хийлгэхэд иргэд зайлшгүй хоёр талдаа очдог байсан бол, зөвхөн нэг талдаа буюу шилжин явах газартаа хандахад л таны мэдээлэл шилжиж очих газар очдог болсон гэсэн үг. Мөн харьяалал харгалзахгүй 10 бүртгэлийг улсын байгууллагаас хийж байна. Нийслэлийн есөн дүүрэг, дөрвөн төв, 108 хороо, 21 аймагт харьяалал харгалзахгүй арван бүртгэлийг хийнэ. Тодруулбал, төрсний, гэрлэсний, гэрлэлт дуусгавар болсны, гэрлэлт сэргээсний, иргэний байнга оршин суугаа газрын хаягийн, эцэг эх тогтоосны, нас барсны, иргэний үнэмлэхийн, биеийн давхцахгүй үйлдлийн (хурууны хээ), үндэсний гадаад паспортын бүртгэлийг харьяалал хар­гал­зах­гүй хий­нэ. Ер нь бол бүртгэлийн бай­гуул­лага аль болох иргэд рүү ойртсон, цахим үйлчил­гээ­нүү­дийг шат дараатай хүргэхээр төлөвлөөд ажиллаж байна.