Чөлөөт бөхийн 2019 оны залуучуудын Монгол Улсын аварга шалгаруулах тэмцээн энэ сарын 23-25-нд Архангай аймгийн төв Цэцэрлэг хотод болно. Тэмцээнийг МЧБХ, "Арж" грүпп, Архангай аймгийн Биеийн тамир, спортын газар, Архангай аймгийн чөлөөт бөхийн холбоо хамтран зохион байгуулж байгаа аж. 

Архангай аймгаас  чөлөөт бөхийн спортоор "Лондон-2012" олимпийн наадмын хүрэл, ДАШТ-ий хошой алт, нэг мөнгөн медальт, хөдөлмөрийн баатар, гавьяат тамирчин С.Батцэцэг, Дэлхийн цомын аваргын хүрэл медальт, Азийн аварга, гавьяат тамирчин Г.Өсөхбаяр, "Москва-1986" Сайн санааны тоглолтын хүрэл, Дэлхийн цомын хошой мөнгөн медальт, гавьяат дасгалжуулагч Т.Сүхбаатар нарын шилдгүүд төрөн гарсан байдаг.  Мөн "Ташкент-2014" ДАШТ-ий мөнгөн медальт ОУХМ Э.Сумъяа, Азийн аварга ОУХМ Т.Зүүнбаян, Ч.Ганзориг, Азийн наадмын мөнгөн медальт ОУХМ Ч.Гочоосүрэн, Б.Жавхлантөгс тэргүүтэй олон шилдэг бөхчүүдийг нэрлэж болох юм.