ХУРААХ

ҮЙЛ ЯВДЛЫН ТОВЧООН

Монгол Улсын нийт хүн ам

Хөгжлийн банкийг Г.Амартүвшин удирдана

Х.БОЛОР (сэтгүүлч)
2019-05-20

Хөгжлийн банкны ТУЗ-ийн хурал өчигдөр болж, гүйцэтгэх захирал Б.Батбаярыг үүрэгт ажлаас нь чөлөөлжээ.  Б.Батбаяр нь 2016 оноос  буюу УИХ-ын сонгуулийн дараагаас тус  банкны гүйцэтгэх захирлаар ажилласан юм. Харин түүний оронд "Шарк, танк" нэвтрүүлгээр олны танил болсон Хас банкны  ерөнхий захирал Г.Амартүвшинг томилсон байна. Тэрбээр 2014 оноос тус банкны ерөнхий захирлаар ажиллаж ирсэн,  ХасБанкинд ажиллахын өмнө  "Тэнгэр" санхүүгийн нэгдлийн ерөнхий захирлаар 3 жил ажилласан байдаг. Монголын орчин үеийн утга зохиолыг үндэслэгч академч Б.Ринчингийн гуч. ABN AMRO банкинд Европын газрын тос, шатдаг хий, эрчим хүч, харилцаа холбооны томоохон гүйлгээг хариуцаж байсан туршлагатай банкир гэгддэг.  Бельги улсын Брюссель хотын Европын Их сургуулийн бизнесийн удирдлагыг бакалавраар төгсөж, АНУ-ын Бостон хотын Харвардын бизнесийн сургуулийн, бизнесийн удирдлагын магистр хамгаалжээ.

Хөгжлийн банкны ТУЗ-ийн даргаар Эрчим хүчний яамны Төрийн захиргаа, удирдлагын газрын дарга М.Баярмагнай ажилладаг бол гишүүдэд нь  Сангийн яамны Төрийн нарийн бичгийн дарга С.Наранцогт, Барилга, хот байгуулалтын яамны Төрийн нарийн бичгийн дарга С.Магнайсүрэн, Уул уурхай хүнд үйлдвэрийн яамны Хуулийн хэлтсийн дарга Н.Баярчимэг нар багтдаг аж.