Боловсролын яамны албан тушаалтны цохолтоор 41 хүүхэд элсүүлсэн гэсэн хэл аманд орооцолдож байсан I сургуулийн захирал Г.Бум-Эрдэнийг өчигдөр баривчилжээ. Тэрбээр нэгдүгээр ангид хүүхэд элсүүлэх, дунд ангиас сурагч шилжүүлэн авахдаа хахууль авдаг байсан хэрэгт сэжиглэгдэж байгаа аж.
Мөн өчигдөр нэгэн иргэн түүнд хахууль өгч байхад нь АТГ-ынхан үйлдэл дээр нь баривчилсан талаар албаны эх сурвалж мэдээллээ. Түүнийг хахууль өгсөн хүнтэй нь хамт саатуулаад байгаа аж.
Тэрбээр “Монголын мэдээ” сонины есдүгээр сарын 26-ны өдрийн дугаарт “Хахууль, хандивын асуудлыг таслан зогсоохын тулд л бид ажиллаж байгаа” хэмээн ярьж байсан удаатай. Гэвч хахууль авахыг зогсоох биш өөр авч байгаад үйлдэл дээрээ ийнхүү баривчлагдсан байна.