Сар шинийн баярыг угтан өнөөдөр нийслэлийн хэмжээнд бүх ААН, байгууллагууд нийтийн цэвэрлэгээний өдрийг зохион байгуулнах юм.

Улаанбаатар хотын Ерөнхий менежерийн хотын нийтийн аж ахуйн ажил үйлчилгээг эрчимжүүлэх чиглэлээр албан даалгавар энэ долоо хоногт гарсан. Үүний дагуу иргэд, аж ахуй нэгж, байгууллагууд орчныхоо 50 метр газрыг цэвэрлэх үүрэгтэй юм. Албан даалгавар гарсантай холбогдуулан хот нийтийн аж ахуйн чиглэлээр үйл ажиллагаа эрхэлдэг мэргэжлийн байгууллагууд, дүүргүүдийн удирдлагуудад дараах албан даалгаврыг өгсөн.

• Нийтийн эзэмшлийн гудамж зам талбайн цас мөс, хог хаягдал орчныг цэвэрлэх,

• Хайс, хашлага, хогийн сав, сандал, хөшөө, баримал,

• Зар сурталчилгааны болон хаяг, хаягийн байгууламж, гэрлийн шон, гэрлэн чимэглэл, нийтийн тээврийн автобус, хог тээврийн автомашины тоос тортгийг цэвэрлэх,

• Эвдэрч гэмтсэн хайс хашлагыг засварлаж нөхөх,

• Шатсан гэрэлтүүлэг, гэрлэн чимэглэлийг сольж, асалтыг сайжруулах

• Инженерийн шугам сүлжээний худгийн алдагдсан тагийг нөхөх

• Хөрсний уснаас үүдэж мөстсөн халиа дошинг цэвэрлэж, иргэдийн зорчих нөхцлийг бүрдүүлэх,

• Гудамж талбайд эзэнгүй явж байгаа золбин нохой муурыг устгах ажлыг эрчимжүүлэх

Албан даалгаварын хэрэгжилтийг энэ сарын 22-оос 02 дугаар сарын 01-ний хугацаанд шуурхай хангуулж ажиллах бөгөөд үүргээ биелүүлээгүй байгууллага, аж ахуйн нэгж, иргэдэд Нийслэлийн Мэргэжлийн хяналтын газраас хууль тогтоомжийн дагуу хариуцлага тооцож ажиллах юм гэж УБЗАА-наас мэдээлэв.