"Уяхан замбуу тивийн наран" урлагийн их наадам болно

Н.ПУНЦАГБОЛД (сэтгүүлч)
2019-08-07

Дундговь аймгийн Гурван сайхан сумын нутаг "Их газрын чулуу"-ны байгалийн задгай театрт "Уяхан замбуу тивийн наран" урлагийн их наадам наймдугаар сарын 9-11 хооронд болно. Энэ сарын 10-ны өдөр наадам нар харах ёслолоор эхлэх юм. Мөн бэсрэг наадам, дааганы баяр ч болно. Түүнээс гадна, 11-ний өдөр 3000 уртын дуучин, морин хуурчийн хүндэтгэлийн тоглолт болохоос гадна "Хөх тэнгэрийн уянга" яруу найргийн наадмыг зохион байгуулах юм.  

Их Газрын чулуу нь Монголын анхны задгай театр бөгөөд Зууны манлай уртын дуучин Н.Норовбанзадын нэрэмжит театр гэгддэг. Байгаль дээрх задгай театрын тайзны диаметр нь 18 метр буюу радиус нь есөн метр бөгөөд газраас 1.4 метр өндөрт байрладаг. Монгол Улсын Хөдөлмөрийн баатар, Төрийн шагналт, Ардын жүжигчин, Зууны манлай уртын дууч Н.Норовбанзад нарын нэр алдрыг мөнхжүүлэх зорилгоор гэрэлт хөшөө босгож, “Уяхан замбуу тивийн наран” уртын дууны үгийг сийлсэн байдаг.