ҮЙЛ ЯВДЛЫН ТОВЧООН

Ч.Алтанхуяг, н.Баярхүү нарыг хил гарахыг хязгаарлав

Д.ОЮУН-ЭРДЭНЭ (сэтгүүлч)
2019-09-12

Сүхбаатар дүүргийн Эрүүгийн хэргийн анхан шатны шүүх прокуророос ирсэн хоёр саналыг өчигдөр хэлэлцжээ. Тодруулбал, Нийслэлийн Прокурорын газраас Д.Доржхандыг цагдан хорих таслан сэргийлэх арга хэмжээ авахуулах санал ирсэнийг хэвээр баталж шийдвэрлэлээ.

Харин Ч.Алтанхуяг, н.Баярхүү нарыг цагдан хорих таслан сэргийлэх арга хэмжээ авах тухай саналыг үндэслэл бүхий баримт тогтоогдохгүй байна гэж үзэн хэрэгсэхгүй болгож тэдэнд Монгол Улсын хилээр гарахгүй байх хязгаарлалт тогтоож, тодорхой хүмүүстэй уулзахгүй байх таслан сэргийлэх арга хэмжээ авч шийдвэрлэлээ хэмээн Сүхбаатар дүүргийн Эрүүгийн хэргийн анхан шатны шүүхээс мэдээллээ.

Зам, тээврийн хөгжлийн яамны Авто замын тээврийн бодлогын хэрэгжилтийг зохицуулах газрын дарга Д.Доржхандын тухайд замын тендерийн сонгон шалгаруулалтад хууль бусаар нөлөөлсөн байж болзошгүй үндэслэлээр шалгаж, баривчилсан аж. Харин ЭМДЕГ-ын дарга Ч.Алтанхуяг болон удирдлагын шатны хоёр хүнийг сэжигтнээр тооцон баривчилсан тухай АТГ-аас мэдээллэсэн билээ.