Гурван өдөр үргэлжилсэн АН-ын Үндэсний бодлогын хорооны ээлжит бус хуралдаан өнөөдөр дууслаа. Хуралдааны сүүлийн өдөр АН-ын даргыг сонгох дотоод сонгууль зохион байгуулагдаж, дөрвөн нэр дэвшигч мөрийн хөтөлбөрөө танилцуулан өрсөлдсөнөөс нэр дэвшигч О.Цогтгэрэл ҮБХ-ны 314 гишүүнээс 196 хүний санал авч, 62.4 хувийн саналаар АН-ын даргаар сонгогдлоо. Тэгвэл АН-ын дарга О.Цогтгэрэл нь өчигдөр болсон “NTV” телевизээр гарсан нэр дэвшигчдийн мэтгэлцээнд оролцохдоо бодлогын асуултуудад ямар хариулт өгснийг уншигч танд тоймлон хүргэе.
-АН-ыг дараагийн сонгуульд ялуулахын тулд ямар бодлого хэрэгжүүлэх вэ?
-Ардчилсан нам манлайллын стратегийг хэрэгжүүлнэ. Миний хувьд систем бүтээж ялалт авч ирэхийн төлөө бодлогоо хэрэгжүүлнэ.
-АН-ын эв нэгдлийг бэхжүүлэхэд таны байр суурь юу вэ?
-Эв нэгдлийг хэрхэн ойлгох нь хамгийн чухал. Тохиролцоод урагшаа явах бус шударга, зарчимтай байхдаа бид хүчтэй. Зарчимгүй эв нэгдлээс илүү зарчим суурьтай шударга байдал, түүнд тулгуурласан ойлголцол гэж боддог.
Намын дүрэм журмын хувьд энэ бүгдийг суулгаж чадвал жинхэнэ эв нэгдэл бэхжинэ гэж үзэж байна. Бидэнд стратегийн манлайлал хэрэгтэй байна. Хотын, залуучуулын, шинэ үеийнхний, мөн бизнес эрхлэгчдийн дэмжлэг авах ёстой.
-2028 он он хүртэл танай намыг хамтарсан Засгийн газарт уривал та дэмжих үү, эсвэл дэмжихгүй юу?
-ҮБХ-ны гишүүд болон намын бусад гишүүдээсээ асууна
-Эдийн засгийн эрх чөлөөтэй холбоотой асууя. Төрийн өмчит компаниудын алдагдал хэтийджээ.Төрийн хэт оролцоог хэрхэн багасгах вэ. Авлига, хулгайг хэрхэн цэгцлэх вэ?
-Өнөөдөр бүх эдийн засаг төсөвжиж, төрөлжиж, төвлөрчихөөд байна. 2017 онд зургаан их наяд төгрөгийн татварын орлого төр авдаг байсан бол өнөөдөр 30 их наяд төгрөгт хүрсэн. Найман жилийн дотор ачаалал зургаа дахин ихсэж, хувийн хэвшлийн орон зайгаа шахаж хумьсан нь харагдаж байна.
Одоо ДНБ-ий 40 хувьд хүрсэн асуудлыг 25 хувьд хүргэнэ. Эдийн засаг “чөтгөрийн тойрогт” орсон. Уул уурхайн баялгийг төрийн өмчит компаниудаар халамж болгон тарааж улс төрийн ялалтыг худалдаж авч байгааг хална. Төвлөрсөн эдийн засгийг төрөлжүүлнэ. Төрөлжсөн эдийн засгийг иргэдэд, төсөвжсөн эдийн засгийг бизнесийнхэнд хүргэх ёстой
-Манай улс ардчиллын индексээр ухарсан. Та намаа хэрхэн яаж цэгцлэх вэ?
-Монголчууд ардчилсан тогтолцоог зөв гэж үздэг гэсэн судалгаа байсан. Гэхдээ тэдний хэмжээний хүн амьдралдаа сэтгэл хангалуун бус байдаг гэсэн судалгаа бий. Гэтэл яагаад АН ялагдаад байна вэ гэвэл ард түмний 30 хувь нь ядууралд өртсөн, мөн 30 хувь нь ядуурлын шугамд ойр байгаагаас шалтгаалж байна. Тиймээс маш том бодлогын өөрчлөлтүүдэд зориг гарган зогсох ёстой. Халамжаар ядуурал буурдаггүй. Хөдөлмөрөөр буурах ёстой. Үүнийг АН хийж чадна. Чөтгөрийн тойргийг өөрчилнө.
-Нийслэл бол том хот. Олон асуудал байна. Сүүлийн гурван сонгуульд Ардчилсан нам нийслэлд ялагдсан. Үүнийг хэрхэн дүгнэж байна. Нийслэлд тулгамдсан асуудлыг хэрхэн шийдэх вэ?
-Бид яагаад нийслэлд ялагдав. Үүний цаад шалтгаан бол Улаанбаатарын залуус болон бизнесүүдийн талд үзэл санаан дээрээ тууштай зогсоогүйн шалтгаан. МАН-ын үнэмлэхүй засагласан жилүүдэд юу болов.
Ардын намд эрх мэдэл, төсөв мөнгө дутаагүй. Хандлага маш ихээр дутаж байна. Хөгжил бол замын хашлага солихоос илүү хүндээ чиглэсэн, хүнээ тойрсон бодлого хэрэгжүүлэх хандлагаас шалтгаална.
-Авлига, хулгайтай хэрхэн тэмцэх вэ. Популист хийхгүйгээр үүнийг шинэчилж чадах уу?
-АН 35 жилийн хугацаанд олонх болж ялж байсангүй. Харин олуулаа болж байсан. Дийлэнх хугацаанд нэг нам эрх барьсан. Аргентин улсын жишээг харахад зүүний популизмд нэрвэгдсэн улсыг хэрхэн засварлах вэ гэдгийг харуулж чадаж байна. Иргэн төвтэй, бизнес төвтэй нам байх, улмаар татварыг бууруулж, иргэдэд боломжийг илүү олгож байж л шинэчлэл ирнэ. Энэ бол “эрүүл популизм” юм.