УИХ-ын гишүүн Ө.Шижир нэг компани буюу MCS-ийн харьяа 37 компаниас тэрбум гаруй төгрөгийн хандив авч, нийт санхүүжилтийнхээ 98 хувийг бүрдүүлсэн гэх баримтыг ил болгосон. Тэгвэл тус намын дарга, Шадар сайд Т.Доржханд албан ёсоор тайлбар өглөө.

Тэрбээр, “Бид хэн нэгний халаасанд ордог нам биш. Цаашаагаа улс төрийн намын санхүүжилт ил болж, хандив өгдөг байх хэрэгтэй. Хандив өгсөн компанийг буруутгаж, цоллож хэрхэвч болохгүй. Мөнгөгүй, мэдлэгтэй улстөрч нар улс төрд орж ирэхийн тулд хандив өгөх, авах ёстой. Хандив ил тод байж, компаниудыг харин ч ил тод зарлаж байж бид явах ёстой юм. Бид MCS-д ямар нэг байдлаар амлалт өгөөгүй. Бид хамааралтай огт биш.  

Энэ нам компаниас хандив авчихсан учраас холбоотой байж таараа гэдэг хөгийн улс төрөө болих ёстой. Биднийг тэрбум ам.доллароор ч худалдаж авч чадахгүй шүү. Надад хэдэн хувь нь орж ирсэн юм бэ гэдэг тоо баримт алга. Хандиваар явж байж л мэргэжлийн мөнгөгүй хүмүүс орж ирэх ёстой юм. MCS нь байна уу, Х.Баттулгын компани нь байна уу хамаагүй хандиваа өгөх ёстой биз дээ. Х.Баттулгынхаа компаний хандив өгсөн тоо ч гаргаад ирэх ёстой. Төгрөг нуурын асуудлыг нь хөндөхөөр энэ нөхөр MCS-ээс хандив аваад энэ асуудлыг хөндлөө гэж ярьж болохгүй. Ирэх долоо хоногт Засгийн газраар “Төгрөг” нуурын асуудлыг хөндөх юм билээ. Манайх хэзээ ч зөрчилдөхгүй ээ. Бас хэн нэгний эрх ашигт үйлчлэхгүй.

Орд тойроод хэрэлдэж муудалцаад яваад байхаар бид мега төслүүдээ явуулж чадахгүй байна шүү дээ. Татвараа аваад баялгийн сангаа баяжуулаад, чи их авсан, аваагүй гэж хэрэлдээд, хэлэлцээрт орно орохгүй гээд байгаа нь буруу шүү. Өөрсдийнхөө дугуйг бүтээгээд хөмөрсөн тогоондоо явсаар байх юм уу. Эдийн засгаа нээе, бодлогын асуудлаа ярьцгаая" хэмээн байр сууриа илэрхийлжээ.