Индонезийн Жакарта хотноо Азийн спортын наадам үргэлжилж байна. Өнөөдөр манай мэргэн буучид цэц мэргэнээ сорьж, нэг дасгалд алт, мөнгөн медаль хүртлээ. 

Тодруулбал,  Азийн наадмын буудлагын спортын эмэгтэйчүүдийн 50 метрийн гурван байрлал төрөлд Монголын тамирчин Г.Нандинзаяа 458.8 оноо авч алтан медаль хүртлээ. Түүний үзүүлэлт Азийн наадмын дээд амжилтыг шинэчлэн тогтоосон юм. Харин Ч.Нарантуяа 451.4 оноогоор мөнгөн медалийн эзэн боллоо.

Тэд урьдчилсан шатнаас нэг, хоёрдугаар байраар шалгарсан бөгөөд шигшээ буудалтад өөр хоорондоо өрсөлдсөөр ийнхүү нэг төрөлд хоёр медалийг эх орондоо авчрав. Ингэснээр Г.Нандинзаяа энэ удаагийн наадмаас хоёр дахь медалиа зүүж байна. Тэрбээр 10 метрийн хийн урт бууны дасгалд хүрэл медаль хүртсэн билээ.