Азийн зуны спортын наадмын самбо бөхийн 48 кг-ын жингийн барилдаан өндөрлөлөө. Энэ жинд Г.Наранцэцэг, Б.Ойдовчимэд гэсэн Монголын хоёр бөх хоорондоо аваргын төлөө барилдлаа. Манай тамирчдын хоорондын "тулаан"-д Г.Наранцэцэг ялж, Азийн наадмын аварга болж, Монголын баг тамирчдын 5 дахь алтан медалийг эх орондоо авчирлаа.
Харин Б.Ойдовчимэд Монголын баг тамирчдын 7 дахь мөнгөн медалийг эх орондоо авчирсан юм. Тэгвэл эрэгтэйчүүдийн 52 кг-ын жинд барилдсан Ш.Эрдэнэбаатар Казахстаны бөх Ибрагим Баглантай барилдаж, өчих мэхээр цэвэр ялагдсанаар мөнгөн медаль хүртлээ. Ийнхүү өнөөдөр самбо бөхийн тамирчид нэг алт, хоёр мөнгөн медаль хүртэв.