Нэр хүнд, цар хүрээгээрээ Аваргуудын лигийн дараа орох Европа лигийн хагас шигшээн эхний хоёр тоглолт өнгөрсөн шөнө боллоо. Европа лигт Английг төлөөлж үлдсэн “Арсенал” клуб энэ шатанд Испанийн шилдгүүдийн нэг “Атлетико Мадрид”-тай учраа таарсан.
Эхний тоглолт “Эмирейтс” цэнгэлдэхэд болж, хоёр баг 1:1-ээр тэнцлээ. Тоглолтын 61 дэх минутад Ляказетт гоолдож, тооны харьцааг нээсэн. Гэвч 82 дахь минутад Гризманн хариуг нь барьж, тэнцүүлжээ. Хариу тоглолт ирэх долоо хоногийн пүрэв гарагийн шөнө болно. “Атлетико” айлын талбайд гоол оруулсан гэдгээрээ бага зэрэг давуу талтайгаар талбайдаа “Арсенал”-ыг хүлээж авах нь.