Испанийн цомын тэмцээний ¼ шигшээн эхний тоглолтууд боллоо. Энэ шатанд “Барселона” клуб “Севилья”-тай учраа таарсан.  Эхний тоглолт “Севилья”-гийн талбайд болж, эзэн баг өрсөлдөгчөө 2:0-ээр буулгаж авлаа. Ийнхүү “Барса” эхний тоглолтдоо хожигдож байна.

Тоглолтын 58 дахь минутад Сарабия гоолдож, тооны харьцааг нээсэн. Улмаар 76 дахь минутад Бен-Йеддер нэгийг нэмжээ.

Нөгөө талд “Реал Мадрид” клуб талбайдаа “Жирона”-г хүлээж авч, 4:2-оор буулгаж авлаа. Ингэснээр хагас шигшээд шалгарах магадлал нэлээд өндөр болж байна. Эзэн багаас тоглолтын 18 дахь минутад Васкес нэг гоол оруулсан бол Рамос 42, 77 дахь минутад дубль хийжээ. Харин Бензема 80 дахь минутад нэг гоол оруулсан байна.

Зочин багаас Лосано 7, Гранель 66 дахь минутад нэг нэгийг оруулсан байна. Испанийн цомын хариу тоглолтууд энэ сарын 29, 30, 31-нд болох билээ.