Испанийн Ла лигийн 21 дүгээр тойргийн зарим тоглолтууд өнгөрсөн шөнө боллоо. Энэ тойрогт хүснэгтийг тэргүүлэгч “Барселона” клуб “Жирона”-гийн талбайд зочилж, 0:2-оор буулгаж авлаа. Ингэснээр 49 оноотой болж, араасаа нэхэж буй багаас 5 онооны зөрүүтэй хүснэгтийг тэргүүлж байна.

Тоглолтын 9 дэх минутад Нелсон Семеду гоолдож, тооны харьцааг нээсэн. Харин 68 дахь минутад Месси нэгийг нэмжээ. Ийнхүү тэрбээр Ла лигт энэ улиралд 19 дэх гоолоо оруулж, мэргэн буучийн жагсаалтыг ганцаараа тэргүүлж байна. 

Харин топ дөрөвт багтах зорилготой байгаа “Реал Мадрид” клуб  “Эспаньол”-ын талбайд зочилж, 2:4-өөр буулгаж авлаа. Ингэснээр 39 оноотой болж, гуравдугаар байрт бичигдэж байна.

Тоглолтын 4 дэх минутад Бензема гоолдож, тооны харьцааг нээсэн. Араас нь Рамос 15 дахь минутад нэгийг нэмсэн. Эзэн багаас 25 дахь минутад Баптистао тооны харьцааг ойртуулсан. Гэвч 45 дахь минутад Бензема дахин нэгийг оруулж, Бэйл 67 дахь минутад гүйцээжээ.  Эзэн багаас Росалес 81 дэх минутад нэг гоол оруулсан ч тоглолтод нөлөөлөхөөр биш байлаа.

Бусад тоглолтын үр дүн

Вальядолид 2-1 Сельта

Реал Сосьедад 0-0 Уэска

Атлетик 1-0 Бетис