Английн премьер лигийн 30 дугаар тойргийн эхний тоглолтууд боллоо. Энэ тойрогт хүснэгтийг тэргүүлэгч “Манчестер Сити” клуб талбайдаа “Уотфорд”-ыг хүлээж авч, 3:1-ээр буулгаж авав. Ингэснээр 74 оноотой боллоо.
Тоглолтын 46, 50, 59 дэх минутад Рахим Стерлинг хет-трик толилуулж, энэ улиралд премьер лигт 15 гоол орууллаа. Ийнхүү тэрбээр мэргэн буучийн жагсаалтын дөрөвдүгээр эгнээнд бичигдэж байна. Харин зочин багаас 66 дахь минутад Деулофеу нэр төрийн ганц гоол оруулжээ.
Хүснэгтийн гуравдугаар байрт бичигдэж байгаа “Тоттенхэм” клуб энэ тойрогт “Саутгэмптон”-ы талбайд зочилж, 2:1-ээр хожигдлоо. Ингэснээр 61 оноотой хэвээр үлдэж, гуравдугаар байраа алдаж магадгүй боллоо. “Манчестер Юнайтед” хожиход тэдэнтэй оноо тэнцэж ирнэ. “Челси” хоёр тоглолтдоо хожвол гурав руу орж ирэх магадлалтай байна.
Тоглолтын 26 дахь минутад Харри Кейн гоолдож, энэ улирлын премьер лигийн 17 дахь гоолоо оруулж, мэргэн буучийн жагсаалтын хоёрдугаар байрт бичигдэж эхэллээ. Тэгвэл Валери 76 дахь минутад хариуг нь барьж, Уорд-Проуз 81 дэх минутад хожлын гоол оруулжээ.
Бусад тоглолтын үр дүн
Ньюкасл 3-2 Эвертон
Хаддерсфилд 0-2 Борнмут
Кардифф 2-0 Вест Хэм
Лестер 3-1 Фүлхэм