Европын аварга шалгаруулах тэмцээний урьдчилсан шатны тоглолтууд болж байгаа билээ. Өнгөрсөн шөнө Н хэсэгт багтсан Францын шигшээ баг талбайдаа Исландыг хүлээж авч, 4:0-ээр буулгаж авлаа.  Ингэснээр хэсгээ 6 оноотой тэргүүлж байна.

Тоглолтын 12 дахь минутад Умтити гоолдож, тооны харьцааг нээсэн.  Харин  68 дахь минутад Жиру нэгийг нэмсэн бол Мбаппе 78 дахь минутад жижүүрийн нэг гоол нэмэрлэжээ.  Улмаар Гризманн 84 дэх минутад гүйцээсэн байна.

Энэ хэсэгт багтсан Туркийн шигшээ баг талбайдаа Молдавыг 4:0-ээр буулгаж авч, хоёр дахь хожлоо байгууллаа. Ингэснээр 6 оноотойгоор хэсгийн хоёрдугаар байрт бичигдэж байна. Тоглолтын 24 дэх минутад Калдырым гоолдож, тооны харьцааг нээсэн бол Тосун 26, 53 дахь минутад дубль хийсэн байна. Улмаар Айхан 70 дахь минутад эцсийн цэгийг нь хатгасан аж.

Энэ хэсгийн гурав дахь тоглолт Андорра болон Албанийн шигшээн хооронд болж, зочин баг 0:3-аар хожжээ. Ийнхүү Албани эхний ялалтаа байгуулж, 3 оноотой боллоо. Тоглолтын 21 дэх минутад Садику гоолдсон бол Балай 87, Абраши 90 дэх минутад нэг нэгийг нэмсэн байна.