Премьер лигийн 33 тойргийн зарим тоглолтууд болж байгаа билээ.  Өнгөрсөн шөнө “Уотфорд” клуб талбайдаа “Фүлхэм”-ийг хүлээж авч,  тоглосон. Энэ тоглолт “Уотфорд”-ын 32, “Фүлхэм”-ийн 33 дугаар тойргийн тоглолт байсан юм. Тоглолтод “Уотфорд” өрсөлдөгчөө 4:1-ээр буулгаж авч, 46 оноотойгоор наймдугаар байрт бичигдэж байна.

Тоглолтын 23 дахь минутад Дукуре гоолдож, тооны харьцааг нээсэн. Харин Бабел 33 дахь минутад тэнцүүлж дөнгөсөн. Гэвч Хьюз 63, Дини 69, Фемения 75 дахь минутад нэг нэгийг оруулж, багтаа хожил авчирлаа.

“Фүлхэм”-ийн хувьд хожигдсоноор 17 оноотой хэвээр үлдэж, доод лиг рүү унах нь тодорхой боллоо. Үлдсэн 5 тойрогт бүгдэд нь хожоод ч 33 оноотой “Бөрнли”-гийн дээр гарах боломжгүй болж байгаа юм. Мөн “Хаддерсфилд” клуб доод лиг рүү унах нь нэгэнт тодорхой болоод байна.