Английн премьер лигийн 36 дугаар тойргийн хүрээнд “Манчестер Сити” клуб “Бөрнли”-гийн талбайд зочилж, 0:1-ээр хожсон билээ. Тоглолтын хувь заяаг шийдсэн цорын ганц гоолыг Сержио Агуэро оруулсан. Ингэснээр тэрбээр премьер лигт энэ улиралд 20 гоол орууллаа. Мөн премьер лигт 5 улирал дараалж 20 болон түүнээс дээш гоол оруулж, Алан Ширерийн амжилттай зэрэгцэв.
Түүнээс гадна, премьер лигт 163 дахь гоолоо оруулж, Жермейн Дефогийн амжилтыг давж гарч, Робби Фаулертэй зэрэгцэж ирлээ. Ийнхүү тэрбээр премьер лигийн бүх цаг үеийн мэргэн буучийн жагсаалтын 6 дугаар байрт бичигдэж байгаа юм. Түүний өмнө 175 гоол оруулсан Анри бичигдэж байгаа билээ. Харин жагсаалтыг Алан Ширер 260 гоолтой тэргүүлдэг юм.