ОХУ-д болж буй хөлбөмбөгийн дэлхийн аварга сонирхолтой тоглолтоор дүүрэн үргэлжилж байна. Хэсгийн гурав дахь тоглолтоос хасаг шатанд шалгарах багуудын хувь заяа шийдэгдсээр.
Өнгөрсөн шөнө хожихоос өөр сонголтгүй хоцорсон Аргентины шигшээ баг хүчирхэг Нигерийн эсрэг шийдвэрлэх “тулаан” хийлээ. Одоо алдлаа л бол бүх зүйл дуусах байсан энэ тоглолтод Аргентины лидер Месси гангарч, үүргээ сайн биелүүлснээр Нигерийг 2:1-ээр хожиж, шөвгийн 16-д үлдлээ.
Тоглолтын 14 дэх минутад Месси гоолдож, энэ дэлхийн аваргын анхны, нийтдээ 6 дахь гоолоо орууллаа. Тэгвэл 51 дэх минутад Виктор Мозес торгуулийн цохилтоос тэнцүүлж, өрсөлдөгч багийнхнаа хүнд байдалд оруулсан. Гэхдээ хожих ёстой баг бууж өгөлгүй, 86 дахь минутад Рохо гоолдож, багтаа хэрэгтэй гурван оноог авчирсан юм.
Ингэснээр Аргентин 4 оноотой болж, Хорватын араас хоёроор гарлаа. Хэрэгтэй цагт Месси багаа аварч чадлаа. Хасагдах шатанд тавтай морил, Месси.