Азийн зуны спортын наадмын жүдо бөхийн тэмцээний хүнд жингийнхний медалийн төлөө барилдаан болж байна. Тэгвэл өнөөдөр 90 кг-д барилдсан Г.Алтанбагана аваргын төлөө барилдаж, Солонгосын Гвак Дон Ханд ялагдсанаар мөнгөн медаль хүртлээ.
Манай бөх D хэсгийг тэргүүлж, эхний тойрогтоо хийлсэн. Харин хоёрдугаар тойрогт Афганстаны Какар Мод Исмайлыг буулгаж авсан. Тэгвэл хэсгийн аваргын төлөө Узбекстаны Шахзодбек Сабировыг ялсан бол хагас шигшээд Тажикстаны Комроншох Устоприоныг ялсан юм. Гэвч Солонгосын шилдэг тамирчинг ялж чадсангүй.
Эрэгтэйчүүдийн 100 кг-д барилдсан Л.Отгонбаатар хүрэл медалийн төлөө Тажикстаны бөх Саидов Сайдзалолыг ялснаар Монголын баг тамирчдын медалийн тоог нэгээр нэмлээ. Ингэснээр жүдогийнхон нэг мөнгө, 6 хүрэл медальтай болоод байна.