ЗГХЭГ-ын дарга С.Бямбацогт “Оюутолгой” ХХК-ийн гүйцэтгэх захирал Дэйрдрэ Лингенфэлдертэй уулзсан байна.

Оюутолгойн ордоос Монголын ард түмэнд оногдох өгөөжийг нэмэгдүүлэх, зээлийн хүүг бууруулах, "Онтре"-гийн асуудлыг харилцан ашигтай байдлаар шийдвэрлэх чиглэлээр баримталж ирсэн Монгол Улсын Засгийн газрын байр суурь хэвээрээ гэдгийг ЗГХЭГ-ын дарга С.Бямбацогт онцолжээ.

Засгийн газар Оюутолгойн гэрээг илүү сайжруулан тодотгох, "Онтре" болон татвар, зээлийн хүүтэй холбоотой зайлшгүй шийдвэрлэх шаардлагатай асуудал дээр ойрын үед нэгдсэн шийдэлд хүрэхээр холбогдох ажлын хэсгүүд ажиллаж байгаа аж.

Тухайлбал:

-Оюутолгойн бүлэг ордын талбайн хил зааг дотор оршдог “Шивээ толгой”, “Жавхлант” нэртэй ашигт малтмалын ашиглалтын тусгай зөвшөөрөл эзэмшдэг “Онтре” компанитай төрийн эзэмшлийн хувь, хэмжээг тогтоох, хөрөнгө оруулагч талтай хэлэлцээ хийх чиг үүрэг бүхий Ажлын хэсгийг Аж үйлдвэр, эрдэс баялгийн сайд Г.ДАМДИННЯМ,

-Оюу толгой төслийн санхүүжилтийн хүүгийн зохистой байдлыг хянан үзэх, өөрчлөх асуудлаар хөрөнгө оруулагч талтай хэлэлцээ хийж, санал боловсруулах үүрэг бүхий Ажлын хэсгийг Сангийн сайд Б.ЖАВХЛАН,

-Лондонгийн олон улсын арбитрын шүүхэд үүссэн маргаанд Монгол Улсын эрх ашгийг хангуулах, Засгийн газрын байр суурийг хамгаалах үүрэг бүхий Ажлын хэсгийг Хууль зүй, дотоод хэргийн сайд Л.МӨНХБААТАР нар ахлан ажиллаж байна.

Уулзалтын үеэр Засгийн газраас хэрэгжүүлэх мега төслүүдийн эхэнд эрэмбэлэгдэж буй ЗЭС ХАЙЛУУЛАХ, АЛТ ЦЭВЭРШҮҮЛЭХ үйлдвэрүүд байгуулахад "Оюутолгой" ХХК ямар оролцоотой байж болох талаар санал солилцжээ.