Энэ сарын 31-ний өдөр АН-ын дараагийн дарга тодрох тов гарч, намын даргад өрсөлдөх хүсэлтээ өнөөдөр АН-ын нэр бүхий гишүүд Дотоод сонгуулийн хороондоо өгч байлаа билээ. Тэгвэл АН-ын даргад өрсөлдөнө гэдгээ мэдэгдсэн УИХ-ын гишүүн Б.Пүрэвдорж байр сууриа илэрхийлэв.

Тэрбээр, "Монголын ардчилал доголон байна. Тэр дундаа улс төрийн эрх чөлөө доголон. Үг хэлэх, үзэл бодлоо илэрхийлэх, хэвлэн нийтлэх эрх чөлөө нь асуудалтай. Эдийн засгийн эрх чөлөө нь доголон. 40 хувийг нь төсөв, 30 хувийг нь төрийн өмчит компаниуд эзэлсэн эдийн засгийн боолтыг тайлах нь миний баримтлах гол зарчим. Ард түмний төлж байгаа татварыг зөв зүйлд зарцуулах, төрийн зардлыг багасгаснаар эдийн засгийг зөв удирдах боломж бүрдэх юм.

Татварын дарамтыг багасгах, НДШ-ийг бууруулах ажлыг хиймээр байна. Төсвөөр дамжиж хувийн хэвшлийг дэмжсэн улс орнууд хөгждөг. Энэ туршлагыг бий болгохыг хүсэж байна. Төрийн зардал хэтэрхий данхайсан. Томоохон албан тушаалтнуудын компани ихэссэн. Эрх баригч намын хулгай хэрээс хэтэрлээ.

Нүүрс, ЖДҮ, Хөгжлийн банкны хулгайд хэн ч хариуцлага тооцсонгүй. Хууль хүчний байгууллагыг ашиглаж хулгайчдынхаа толгойг илээд сууж байгаа. Хэдэн их наядаар идсэн хүмүүс хэдхэн жил суугаад магадлангаар гарч байгаа учраас хариуцлагын системийг бий болгох ёстойг шаардана. 2028 онд АН ялагдах эрхгүй явах ёстой.

Эв нэгдэлтэй, илүү сайн зохион байгуулалттай байж, эрх баригч намын гар хөл орохгүй явснаар ард иргэдийнхээ итгэлийг олж чадах юм. Монгол Улс 330 сумтай. Түүний талаар нь буюу 165 суманд би ажиллаад ирлээ. Ингэж явж байхад ард иргэд төрд болохгүй байгаа зүйлсийг захиж хэлж байна. Тиймээс би АН-ын дарга болчихвол эв нэгдлийг хангаж, ард иргэдийнхээ дунд илүү сайн ажилласнаар ялалтад хүргэж чадна гэж бодож байгаа.

АН-ын даргын төлөө өрсөлдөгчид бүгд мэдлэг боловсролтой залуус байгаа. Тэд маань бүгд ялагдвал ялсан нэгнээ дэмжээд ажиллах болно. Би долоо хоног бүр Ардын намын булхайтай тэмцэж, үгээ хэлж яваа. Тийм учраас жирийн гишүүд маань намайг дэмжинэ. Энэ намын төлөө илүү их хичээнэ. Хэн нэгний ятгалгад орохгүйгээр ялалтын төлөө зүтгэж чадна. Надад хэн нэгэнтэй тохиролцох бодол алга. Шийдсэн шийдвэрээсээ буцах бодол алга. Би нэрээ татахгүй. Явсан зам, хэлсэн үгнээсээ буцахгүй" гэлээ.