“Будапешт-2018” ДАШТ-ий эмэгтэйчүүдийн 65, 68, 72, 76 кг-ын жингийн хагас шигшээ барилдаан өчигдөр болж өндөрлөсөн. Тэгвэл манай бөхчүүдээс  72 кг-ын жинд зодоглосон   ДАШТ-ий гурван хүрэл медальт,  Монгол Улсын гавьяат тамирчин Очирбатын Насанбурмаа финалд үлдлээ. 

Манай бөх хагас шигшээд энэ жилийн цэргийн ДАШТ, Красноярскийн “Алтан Гранпри”, “Сhina Open”-д түрүүлээд байгаа БНХАУ-ын Ван Хуаныг цэвэр ялснаар алтан медалийн төлөө барилдахаар шалгарсан юм.  Дэлхийн дэвжээнээс дөрөв дэх медалийн болзлоо хангаад буй О.Насанбурмаа өнөөдөр  шигшээ барилдаанд өнгөрсөн жилийн ДАШТ-ий хүрэл медальт, Пан-Америкийн гурван удаагийн аварга Канадын Жюстина Ди Стасиотой хүч үзнэ.

Түүнээс гадна, манай бөхчүүдээс 65 кг-ын жинд барилдсан ОУХМ Х.Болортуяа дагаж барилдахаар боллоо. Манай тамирчинг ялсан   Канадын бөх шигшээд шалгарснаар түүнд медалийн төлөө барилдах боломж гарч ирлээ.