Испанийн лигийн цом буюу “Copa del rey” тэмцээний 1/16 шигшээ тоглолтуудын ихэнх нь өнгөрсөн шөнө боллоо. Энэ шатанд “Реал Мадрид” клуб доод лигийн “Мелилья” багийн талбайд зочилж, 0:4-өөр буулгаж авлаа. Ингэснээр шөвгийн 16-д шалгарч байна.

Тоглолтын 28 дахь минутад Бензема гоолдож, тооны харьцааг нээсэн. Түүний араас Асенсио 45, Одриосола 79, Гонсалес 90 дэх минутад нэг нэгийг нэмжээ.

“Барселона” клубын хувьд энэ шатанд “Культураль Леонеса” багийн талбайд зочилж, 0:1-ээр хожлоо. “Барса” сэлгээний бүрэлдэхүүнээ гаргаж, гол тоглогчдоо бүгдийг нь амраасан нь эгээтэй л тэмцээнээс хасагдчихсангүй. Эцсийн мөчид буюу 90 дэх минутад Лангле гоолдож, багаа аварчээ.