Английн премьер лигийн 32 дугаар тойргийн эхний тоглолтууд боллоо. Энэ тойрогт “Манчестер Сити” клуб доошоо унах магадлалтай өндөртэй болсон “Фүлхэм”-ийн талбайд зочилж, 0:2-оор буулгаж авлаа. Ингэснээр 77 оноотой болж, хүснэгтийг тэргүүлж эхлэв. Тоглолтын 5 дахь минутад Бернарду Силва гоолдож, тооны харьцааг нээсэн. Улмаар Агуэро 27 дахь минутад нэгийг нэмж, багийнхаа хожлыг баталгаажуулжээ. Мөн тэрбээр 19 гоолтой болж, мэргэн буучийн жагсаалтыг ганцаар тэргүүлж байна.
Энэ тойрогт “Манчестер Юнайтед” клуб талбайдаа “Уотфорд”-ыг хүлээж авч, 2:1-ээр буулгаж авлаа. Ингэснээр 61 оноотой болж, дөрөвдүгээр байр руу орж ирлээ. Гэхдээ “Арсенал”-ыг тоглолтоо хийх хүртэл тэд энэ байрт бичигдэнэ. “Их буучид” хожигдох, тэнцэх, хожихоос хамаараад байр нь өөрчлөгдөх юм.
Тоглолтын 28 дахь минутад Рэшфорд гоолдож, тооны харьцааг нээсэн. Улмаар 72 дахь минутад Марсьяль нэгийг нэмжээ. Зочин багаас 90 дэх минутад Дукуре нэг гоол оруулж, нэр төрөө аварсан байна.
Бусад тоглолтын үр дүн
Брайтон 0-1 Саутгэмптон
Бөрнли 2-0 Вулверхэмптон
Лестер 2-0 Борнмут
Кристал Палас 2-0 Хаддерсфилд
Вест Хэм 0-2 Эвертон