Английн премьер лигийн 34 дүгээр тойргийн зарим тоглолтууд боллоо. Энэ тойрогт “Тоттенхэм” клуб талбайдаа “Хаддерсфилд” багийг хүлээж авч, 4:0-ээр буулгаж авлаа. Ингэснээр “Тоттенхэм” 67 оноотойгоор гуравдугаар байрт бичигдэж эхэллээ. Мөн тэд нэг тойргийн тоглолт дутуу байгаа.
Энэ удаагийн тоглолтын 24 дэх минутад Ваньяма гоолдож, тооны харьцааг нээсэн. Тэгвэл Лукас Моура 27, 87, 90 дэх минутад хет-трик хийж, багтаа ялалт авчирсан юм. Мөн тэрбээр энэ улиралд 10 гоолын босго давсан “Тоттенхэм”-ийн гурав дахь тоглогч болж байна. Харри Кейн 17 гоолтой бол Сон 12 гоол оруулсан байгаа билээ.
Топ дөрөвт багтахын төлөө ширүүн өрсөлдөж байгаа “Манчестер Юнайтед” клуб энэ тойрогт “Вест Хэм”-ийг талбайдаа хүлээж авч, 2:1-ээр буулгаж авлаа. Ингэснээр 64 оноотой болж, 5 дугаар байрт бичигдэж байна. “Улаан чөтгөрүүд”-ийн хувьд нэг тойргийн тоглолт дутуу. Тэр тоглолтдоо хожиж, “Сити”-гээс талбайдаа оноо салгаж чадвал дөрөвдүгээр байрт шалгарах магадлал бий.
Энэ удаагийн тоглолтын 19, 80 дахь минутад Погба хоёр удаа торгуулийн цохилтоос гоолдож, багтаа хэрэгтэй 3 оноог авчирлаа. Харин зочин багаас Фелипе Андерсон 49 дэх минутад нэг гоол оруулжээ.
Бусад тоглолтын үр дүн
Бөрнли 2-0 Кардифф
Фүлхэм 2-0 Эвертон
Саутгэмптон 3-1 Вулверхэмптон
Брайтон 0-5 Борнмут
Н.Пунцагболд