АНЭУ-ын Фужара хотноо Ази, Номхон далайн бүсийн жүдо бөхийн аварга шалгаруулах тэмцээн болж байгаа билээ. Өнөөдөр эрэгтэй 73, 81, эмэгтэй 63, 70 кг-ын барилдаанууд болно. Эрэгтэйчүүдийн 73 кг-д Ц.Цогтбаатар барилдана. Манай бөх С хэсэгт багтаж, эхний тойрогтоо Хойд Солонгосын бөх Ким Чол Гуантай барилдахаар оноолт таарлаа.
Харин 81 кг-д О.Ууганбаатар барилдана. Манай бөх С хэсгийг толгойлж, эхний тойрогтоо хийллээ. Харин хоёрдугаар тойрогт Туркмэнстан болон Бахрайн улсын бөхчүүдийн ялсантай нь барилдана. Эмэгтэйчүүдийн 63 кг-д Б.Ганхайч барилдах бөгөөд С хэсгийг толгойлж, эхний тойрогтоо хийллээ. Хоёрдугаар тойрогт Бахрайн улсын бөх Солтани Римтэй барилдахаар оноолт таараад байна.
70 кг-д Ц.Батцэцэг барилдана. Манай бөх В хэсэгт багтаж, эхний тойрогтоо Хойд Солонгосын Сун Ёнтай барилдахаар оноолт таарлаа. Ялж чадвал Японы бөх Танака Шихотай барилдах магадлал өндөр байна.