Үндэсний бодлогын хорооны ээлжит бус өнөөдрийн хуралдаанд Ардчилсан намын даргын сонгуульд нэр дэвшигчид мөрийн хөтөлбөрөө танилцуулж дууссан бөгөөд ҮБХ-ны гишүүд асуулт асууж, хариулт авч дууссаны дараа санал хураалт үргэлжилж байна. 

Нэр дэвшигчид АН-ын дарга болсон тохиолдолд нэн тэргүүнд ямар бодлого баримталж ажиллах талаараа танилцуулахдаа, 

Нэр дэвшигч О.Цогтгэрэл: Ардчилсан нам манлайллын стратегийг хэрэгжүүлнэ. Миний хувьд систем бүтээж ялалт авч ирэхийн төлөө бодлогоо хэрэгжүүлнэ. Тохиролцоод урагшаа явах бус шударга, зарчимтай байхдаа бид хүчтэй.

Зарчимгүй эв нэгдлээс илүү зарчим суурьтай шударга байдал, түүнд тулгуурласан ойлголцол гэж боддог. Бидэнд стратегийн манлайлал хэрэгтэй байна. Хотын, залуучуулын, шинэ үеийнхний, мөн бизнес эрхлэгчдийн дэмжлэг авах ёстой. Эдийн засаг “чөтгөрийн тойрогт” орсон.

Уул уурхайн баялгийг төрийн өмчит компаниудаар халамж болгон тарааж улс төрийн ялалтыг худалдаж авч байгааг хална. Төвлөрсөн эдийн засгийг төрөлжүүлнэ. Төрөлжсөн эдийн засгийг иргэдэд, төсөвжсөн эдийн засгийг бизнесийнхэнд хүргэх ёстой. Халамжаар ядуурал буурдаггүй. Хөдөлмөрөөр буурах ёстой. Үүнийг АН хийж чадна. Чөтгөрийн тойргийг өөрчилнө. Иргэн төвтэй, бизнес төвтэй нам байх, улмаар татварыг бууруулж, иргэдэд боломжийг илүү олгож байж л шинэчлэл ирнэ. Энэ бол “эрүүл популизм” юм.

Нэр дэвшигч Б.Пүрэвдорж: Өнгөрсөн парламентын хамгийн олон хууль тогтоол батлуулсан гишүүний хувьд надад Ардчилсан намыг ялуулах туршлага бий. Бүхий л хугацаанд би эрх баригчдад хяналт тавихад л анхаарч ирлээ.

АН гишүүддээ хүрдэг, нээлттэй нам байх ёстой. Нийт эдийн засагт эзлэх төрийн оролцоо 75 хувьд хүрсэн. Төсвийн хөрөнгө оруулалт дагасан 500 гаруй аж ахуйн нэгж бий. Тэдний ихэнх нь дарга нарынх.

Төр томрох тусам иргэд нь жижгэрэх. Төрийн оролцоог багасгах ажлыг хийх ёстой. Төрийн эзлэх хувийг 30 хувь хүртэл буулгана. Шударга сонгууль явуулах, хэвлэлийн эрх чөлөөг хангах, шүүхийн хараат бус байдлыг бэхжүүлэх, иргэдийн эрх чөлөө, оролцоог хангах, авлигын эсрэг тэмцэхгүй байна. Энэ бүхэн Монголын хөгжилд саад болж байгаа. Авлигатай алагчлан тэмцдэг.

МАН өнгөрсөн есөн жилийн хугацаанд ард түмний боломжийг хулгайлсан. Эрх баригчид нэгэндээ хариуцлага тооцож чадахгүй. АН төрийн эрхийг барьвал өнөөдрийн бүх хулгайг илчилж, хариуцлага тооцох болно. АН-ыг ялуулж байж, Монголд энэхүү өөрчлөлт бий болно.

Нэр дэвшигч Ж.Баярмаа: Бид бүгдийн давуу талууд нийлж байж Ардчилсан намыг ялалтад хүргэнэ. Бодлогын судалгааны хүрээлэнд бид ач холбогдол өгч байх ёстой. Улстөрч хүн бодлоготон, үзэл санаандаа үнэнч, алсын хараатай, үнэт зүйлсээ хэрэгжүүлэх тууштай хүн байх ёстой. Миний хувьд энэ зарчмын төлөө ажиллаж чадна. “Зориг” үгүй бол манлайлал үгүй.

Няцашгүй чанар надад бий. Хувийн хэвшил эдийн засгийг нуруундаа авч явдаг. Төрийн өмчийн компаниуд 68 их наядын хөрөнгөтэй байна. Бүтэц орон тоо маш данхагар. АН-ын бодлого бол эрүүл эдийн засаг. Хувийн хэвшлийн хувь оролцоо илүү байж эдийн засаг эрүүлжинэ.

Төрийн өмчит компаниудыг хувьчлах ёстой. Олон нийтийн болгох ёстой. Сонгуулийн менежерүүдийн шагналд очдог үүр уурхай байгаа байдлыг таслан зогсоох хэрэгтэй. Мөнгө хулгайлаад дараагийн сонгуульд ялдаг тогтолцоог нурааж байж энэ асуудлыг цэгцэлнэ. Дуусдаггүй бяслаг, дуусдаггүй хогны үйлдвэр бол авлигын том жишээ. Сонгуульд асар их мөнгө зарцуулж байгаа нь авлигыг устгах биш, томруулах шалтгаан.

Нэр дэвшигч Б.Отгонбат: Судалгаанд суурилсан хөгжлийн бодлого, өрсөлдөх чадвараа тооцоолж Монгол Улсдаа өөрчлөлт авч ирнэ. Миний давуу тал “Дэлхийтэй харилцах”.

АН үнэт зүйлээсээ холдож болохгүй. Мөнгөөр биш мэдлэгээр уралддаг байх ёстой. Улс төрийн тогтолцоо маш их авлигажсан. Төрийн өмчит байгууллагуудад хяналтын тогтолцоо алдагдлаа. Төрийг тунгалаг болгох ёстой. Жижиг дунд үйлдвэр эрхэлж болон бага орлоготой хүмүүст татварын хөнгөлөлт үзүүлье.

Хариуцлагын тогтолцоог л хэлбэрэлтгүй хэвшүүлж, төр нь хувийн бизнесийг булаадаг зүй тогтлыг халъя. Монгол хүндээ, монгол хүний ур чадварт итгэе. Уул уурхайгаас олсон баялгаа боловсролын салбарт оруулмаар байна. Боловсролын салбар босож байж чинээлэг дундаж давхарга бэхжинэ. Монгол мөрөөдлийг тодорхойлох нь эх орондоо сайхан амьдрах боломж гэж үзнэ. Улс төрийн тогтолцооны шинэчлэл, баялгийн тэгш бус байдлыг шийдэхгүйгээр бид урагшлахгүй хэмээн тус, тус байр сууриа илэрхийлэв.