ҮЙЛ ЯВДЛЫН ТОВЧООН

Ц.Туваан: УИХ-аас баталсан үндсэн чиглэлийн хүрээнд хэлэлцээр явуулахаар тохирч чадлаа

O.Admin
3 цагийн өмнө

Гашуунсухайт-Ганцмод боомтын хил дамнасан төмөр зам, нүүрсний худалдаа, Тавантолгойн нүүрсний уурхайн хүчин чадлыг нэмэгдүүлэх хамтын ажиллагааны тухай Монгол Улс, БНХАУ-ын Засгийн газар хоорондын хэлэлцээр байгуулах тухай төслийг хэлэлцээд Улсын Их Хурлын холбогдох Байнгын хороотой зөвшилцөхөөр тогтлоо.

Тус хэлэлцээр нь хоёр талд урт хугацаанд эдийн засгийн тогтвортой өсөлт бий болгох, хоёр талын төрийн өмчит хуулийн этгээд хооронд байгуулах нүүрс худалдах, худалдан авах гэрээг харилцан ашигтай, нийлүүлэлт тогтвортой байх зарчмын дагуу байгуулах, нүүрсний орд дахь уурхайн хүчин чадлыг нэмэгдүүлэхтэй холбогдсон харилцааг зохицуулах зорилготой. Монгол Улсын нүүрсний олборлолт, экспортын хэмжээ нэмэгдэж, Үндэсний баялгийн сангийн тухай хуулийн хэрэгжилт эрчимжиж газрын хэвлийн баялгийн үр өгөөжийг иргэн бүрд тэгш, шударга хүртээх боломж бүрдэнэ гэж үзэж байна.

Улсын Их Хурлын 2024 оны 21 дүгээр тогтоолоор баталсан “Монгол Улсын Засгийн газрын 2024-2028 оны үйл ажиллагааны хөтөлбөр”-т 14 мега төсөл хэрэгжүүлэхээр тусгасны нэгдүгээрт Гашуунсухайт-Ганцмод, Ханги-Мандал, Шивээхүрэн-Сэхээ хилийн боомтуудын хил дамнасан холболтын төмөр зам, ачаа тээврийн шилжүүлэн ачих терминалыг барина гэж заасан юм. Энэ талаар Уул уурхай, хүнд үйлдвэрийн сайд Ц.Туваан мэдээлэл өгсөн юм.

Ц.Туваан сайд хэлэхдээ “Гашуунсухайт-Ганцмод, Шивээхүрэн-Сэхэ, Хангимандал-Бичигтзүүн хатавчийн төмөр замын хил холболтын асуудлыг шийдэх нөхцөл үүслээ.

Засгийн газар хоорондын хэлэлцээрийг байгуулахад баримтлах үндсэн чиглэлийг УИХ-аас саяхан баталсан. Энэ чиглэлийн хүрээнд хэлэлцээрээ явуулахаар тохирч чадлаа. 12 заалттай тус чиглэлд дан ганц хил холболт бус сэргээгдэх эрчим хүчний экспорт, барилгын салбарт хийгдэх бусад төслүүдэд гарааны нөхцөл болж чадна” гэлээ.