Гадаад улсад байгаа иргэдийн санал авах ажлыг зохион байгуулж дууссантай холбогдуулан өчигдөр /06.01/ Төв комиссын дарга ГХЯ-ны Төрийн нарийн бичгийн дарга Н.Анхбаяр, СЕХ-ны гишүүн Д.Баяндүүрэн, ГХЯ-ын ТЗУГ-ын Хуулийн хэлтсийн дарга Р.Бизьяа нэр мэдээлэл өглөө.

Монгол Улсын Ерөнхийлөгчийн 2021 оны сонгуулиар гадаад улсад байгаа сонгогчдын санал авах ажиллагааг Сонгуулийн ерөнхий хорооны тогтоолоор байгуулагдсан Гадаад улсад байгаа иргэдийн санал авах ажлыг зохион байгуулах Төв комисс болон Монгол Улсаас гадаадын 30 улсад суугаа 44 Дипломат төлөөлөгчийн газрын дэргэд байгуулагдсан Салбар комиссуудад 2021 оны 5 дугаар сарын 30-31-ний өдрүүдэд амжилттай зохион байгуулж дуусчээ.

Монгол Улсын Ерөнхийлөгчийн энэ удаагийн сонгуулиар гадаад улсад саналаа өгөх сонгогчдын нэрсийн жагсаалтад орсон 7394 сонгогчийн 76 хувь буюу 5618 сонгогч санал өгсөн болно. Монгол Улсын Ерөнхийлөгчийн 2017 оны сонгуулиар гадаадад байгаа 7209 иргэн бүртгүүлж, нэрсийн жагсаалтад орсны 66.3 хувь буюу 4767 иргэн сонгуульд оролцож санал өгсөн байдаг.

Энэ удаагийн сонгуульд хамгийн олон сонгогч санал өгсөн газрууд:

Сөүл дэх Салбар комисст 753 (69.9 хувь)

Токио дахь Салбар комисст 719 (86.7хувь)

Канберра дахь Салбар комисст 532 (69.4 хувь)

Вашингтон дахь Салбар комисст 467 (76.2 хувь) Монгол Улсын Ерөнхийлөгчийн сонгуулийн тухай хуульд зааснаар Сонгуулийн Ерөнхий хороо гадаад улсад байгаа сонгогчдын санал тоолох ажиллагааг хийх бөгөөд санал авах өдөр буюу 2021 оны зургадугаар сарын 09-ний 22:00 цагт ажиглагч, хэвлэл мэдээллийн байгууллагын төлөөллийг байлцуулан ил тод, нээлттэй явуулах юм.

“Ковид-19” цар тахлын эрсдлээс сэргийлэх зорилгоор гадаадын улс орнуудад зорчих хөдөлгөөн хязгаарлагдсан, хөл хорио тогтоосон онцгой нөхцөл байдалтай байгаа хэдий ч манай иргэд сонгуульд идэвхтэй, өндөр ирцтэй оролцсонд Төв комиссын зүгээс талархал илэрхийллээ.