Баянголд вант улсаа байгуулсан “Оргил”-ын Ж.Ганбаатар Баянгол дүүргийн ИТХ-д өөрийн компанийн туслах, зөвлөх, бизнесийн хамтрагч, дүү, найз гээд нийтдээ 21 хүнийг дэвшүүлж буй талаар бид өмнөх дугаартаа нийтэлсэн билээ.
Тэгвэл төрийн албан хаагчдыг сонгуулийн сурталчилгаандаа ашиглаж буй гэх Баянгол дүүргийн Засаг дарга Ө.Сумъяабаатар гэгч багын найзуудадаа дүүргийн ИТХ-ын төлөөлөгчид нэр дэвших мандат “бэлэглэж” аархсан баримтыг уншигч танд хүргэе.
Уг нь 2023 оны гуравдугаар сард Улаанбаатар хотын Засаг дарга асан Д.Сумъяабазар тушаал гарган Ө.Сумъяабаатар гэгчийг Засаг даргын үүрэгт ажлаас нь чөлөөлсөн ч ажлаа өгөх нь байтугай уг шийдвэрээр шүүхэд хандан, эргээд арваннэгдүгээр сард үүрэгт ажилдаа томилогджээ.
Түүнийг буцааж ажилд нь томилох ажлыг өнөөх “сайн ах” Ж.Ганбаатар нь гүйцэтгэж, Ерөнхий сайдтай уулзаж гуйсаар байгаад үлдээсэн гэх мэдээллийг “isee.mn” сайт дэлгэн тавьжээ. Эрхэм даргын булхайтай үйлдэл ингээд дуусахгүй. 2024 оны зургадугаар сард тэр УИХ-ын сонгуульд дүүрэгтээ нэр дэвшин өрсөлдсөн. Гэсэн ч хэний ч танихгүй шахам ХҮН-ын инженерт ялагдчихсан нь түүнийг дүүргээ дөрвөн жил яаж удирдсаныг бэлхнээ харуулсан жишээ болж байв.
Гэтэл хэдхэн өдрийн өмнө Хотын дарга Х.Нямбаатар “УИХ-ын сонгуульд өрсөлдөөд ялагдсан хэнд ч мандат өгөхгүй” хэмээн хатуухан мэдэгдэл хийсэн ч энэ мэдэгдэл үйлчлээгүй ганц хүн нь өнөөх Ө.Сумъяабаатар. Дүүргийн Засаг даргаар дөрвөн жил ажилласан атлаа дүүрэгтээ ялагдчихсан хүнээс хариуцлага нэхэж, ажлаас нь чөлөөлөх бус бүр ангийн найзуудтайгаа эргэж ирээд өрсөлдөх боломж олгож, ганцхан хүнд зориулан дүрмээ өөрчилсөн шалтгаан нь юу байв. Нөгөөх л сайн ахын дэмжлэг үү.
Ө.Сумъяабаатар гэгч нь Архангай аймгийнх. Тэгвэл үе тэнгийн нэг нутгийн найз Ганбаатарын Мөнхсайхан, Жамсрангийн Баатар, Нямсүрэнгийн Доржзодов гэсэн архангайн фракцийн найзуудаасаа гадна дотны найз Б.Агваанцэрэн, Ч.Чойдог нартаа мөн дахин мандат өгч, эрхлүүлжээ. Төрийн албыг төрлийн алба болгож, бүр бүлэглэл фракци, найз нөхдөөрөө төрд өрсөлддөг энэ буруу жишгийг Нийслэлийн МАН-ын дарга Х.Нямбаатар мэдээгүй юу, эсвэл мэдэн будлив уу. Өөрийн гаргасан дүрэм журмаа Ө.Сумъяабаатарт зориулан өөрчилж, Их хуралд ялагдсан нөхрийг Баянгол дүүрэгт ялалт байгуулж чадна гэж итгэсний ард их том эрх ашиг нуугдаа биз хэмээн хардахад хүргэж байна.
