Эрчим хүчний тухай хуульд заасны дагуу Эрчим хүчний зохицуулах хороо нь 2024 оны ажлын тайлан, Эрчим хүчний салбарын үйл ажиллагааны дүнг Эрчим хүчний яам болон эрчим хүчний үйлдвэр, компаниудад танилцууллаа. Жил бүр тогтмол зохион байгуулдаг тус тайлангийн хуралд салбарын 100 гаруй үйлдвэр, компанийн 200 орчим төлөөлөл оролцож байна.

2024 онд Монгол Улсын эрчим хүчний нийт хэрэглээ 11.6 тэрбум кВт.ц хүрч, өмнөх оноос 5.9 хувиар, харин өвлийн улирлын оргил ачааллал 1655 МВт-д хүрч өмнөх оноос 1.2 хувиар тус тус өссөн байна. Эрчим хүчний нийт хэрэглээний 75.3 хувийг дотоодын үйлдвэрлэлээр хангаж, 24.7 хувийг импортоор авч хэрэглэсэн. Өнгөрөгч 2024 онд цахилгаан эрчим хүчний үнэ анх удаа өртөгтөө хүрч, Монгол Улс эрчим хүчний дутагдлаас гарах, хөрөнгө оруулалт татах, эрчим хүчний хангамжийн аюулгүй, найдвартай байдлыг хангах анхдагч таатай нөхцөл бүрдсэн гэдгийг хурлын үеэр онцоллоо.

Эрчим хүчний зохицуулах хороо 2024 онд:

-Эрчим хүчний үнэ тарифыг үйлдвэрийн өртөгт хүргэх тарифын шинэчлэл хийсэн. Цахилгааны дундаж тариф 1 кВт.ц тутамд 216 төгрөг байсныг дунджаар 29.6 хувиар нэмэгдүүлж, 280 төгрөг буюу өртөгт нь хүргэсэн. Айл өрхийн хувьд хэрэглээнээс хамаарсан шаталсан тарифын тогтолцоог нэвтрүүлж, тарифыг 30-85 хувиар шинэчлэн тогтоосон.

- Хэрэглэгчийн сэргээгдэх эрчим хүчний үүсгүүрээс түгээх сүлжээнд нийлүүлэх цахилгаан эрчим хүчний тарифыг 06:00-17:00 цагт 285 төгрөг, 17:00-21:00 цагт 300 төгрөг болгож хөрөнгө оруулалтыг нөхөх түвшинд шинээр тогтоосон.

-Тусгай зөвшөөрлүүдийн нөхцөл, шаардлагад Дулааны цахилгаан станцуудын дотоод хэрэгцээний цахилгаан, жишмэл түлшний хувийн зарцуулалт, цахилгаан дамжуулалт, түгээлтийн алдагдлын хувь хэмжээг бууруулж хэмнэлт гаргах талаар зохих шаардлагыг тусгаж хэрэгжилтийг дэмжиж ажилласнаар 2024 онд нийт 9,1 тэрбум төгрөгийн хэмнэлтийг гаргалаа.

- 2024 онд нийт 129.3 мянган хэрэглэгчдэд ухаалаг тоолуур суурилуулснаар алдагдлыг бууруулсан. Улмаар 12,7 тэрбум төгрөгийн хэмнэлт гарсан. Хэрэглэгчид хэрэглээгээ хянах, хэмнэх боломж бүрдсэн.

-Үүрэг хүлээсэн хэрэглэгчид 2024 онд эрчим хүч хэмнэлтийн чиглэлээр 990 нэр төрлийн үйл ажиллагааг хэрэгжүүлж 19.5 сая кВт.ц цахилгаан эрчим хүч, 57.4 мянган Гкал дулааны эрчим хүчний хэмнэлт гарах боломжийг бүрдүүлж 38.0 мянган тонн хүлэмжийн хийн ялгарлыг бууруулж ажилласан байна.

-Эрчим хүчний хэмнэлттэй, үр ашигтай хэрэглээг нэмэгдүүлэх, зардлыг бууруулах зорилгоор “Дулаалаад хэмнэе” байшин, сууцыг дулаалах сайн жишээг УБЦТС ТӨХК-тай хамтран хэрэгжүүлсэн. Тус бүр 4 ам бүлтэй 2 өрхийн байшинг стандартын дагуу дулаалж, хэмжилт хийхэд эрчим хүчний зарцуулалт 50 хүртэл хувиар буурсан үзүүлэлт гарсан.

- Эрчим хүчний салбарын хэмжээнд хэрэглэгчдийн өргөдөл, гомдлыг хүлээн авах, шийдвэрлэх, тусгай зөвшөөрөл эзэмшигчид нь хэрэглэгчийн өргөдөл, гомдлыг бодитой, түргэн шуурхай шийдвэрлэж байгаа эсэхийг хянах, хэрэглэгчийн статистик үзүүлэлтүүдийг боловсруулах, дүн шинжилгээ хийх зориулалт бүхий “Хэрэглэгчийн өргөдөл, гомдлын бүртгэл, хяналтын нэгдсэн цахим систем” (https://consumer.energy.mn)-ийг Диспетчерийн үндэсний төвтэй хамтран хөгжүүлж нэвтрүүлсэн. Улаанбаатар хотод цахилгаан, дулаан түгээх, хангах үйл ажиллагаа явуулж буй нийт 74 тусгай зөвшөөрөл эзэмшигч компани, байгууллга тус системээр дамжуулан хэрэглэгчдээс ирүүлсэн гомдол, маргааныг шийдвэрлэж байна.

• Эрчим хүчний зохицуулах хороо 2024 онд 2239 өргөдөл, гомдлыг хүлээн авч нийт 12519 хэрэглэгчийг хамарсан асуудлыг шийдвэрлэн ажиллалаа. Түүнчлэн эрчим хүчний салбар дотооддоо хэмнэлт хийж, үйлдвэр, аж ахуйн нэгж, байгууллагууд, хэрэглэгчид дор бүрнээ эрчим хүчний хүрэлцээг нэмэгдүүлж, 2024-2025 оны оргил ачааллыг бууруулахад дэмжлэг болсон байна.