Ардчилсан намын ҮБХ-ны ээлжит бус хуралдаан өнөөдөр Төрийн ордонд үргэлжилж, дараагийн намын даргаа тодруулах гэж байна. АН-ын даргад нийтдээ найман хүн нэр дэвших сонирхлоо илэрхийлснээс О.Алтангэрэл нэрээ татаж, Л.Мөнхбаясгалан, Ч.Лодойсамбуу нар ҮБХ-ны гишүүнээр дөрвөн жил ажиллаагүй гэдэг үндэслэлээр хасагдсан бол нэр дэвшигч Ө.Шижир дэнчингийн мөнгө буюу 200 сая төгрөгийн намд өгөх дэмжлэгт бүдэрч хасагдсан.
Улмаар нэр дэвшигч О.Цогтгэрэл, Б.Пүрэвдорж, Ж.Баярмаа, Б.Отгонбат гэсэн нэр дэвшигчид тунаж үлдэн, өчигдөр “NTV” телевизээр мэтгэлцээнд оролцов.
Нэр дэвшигчид тус бүр уриа үг дэвшүүлсэн бөгөөд УИХ-ын гишүүн, нэр дэвшигч О.Цогтгэрэл “Шинэ Монголоо цуг бүтээе” уриа дэвшүүлсэн бол Б.Пүрэвдорж “Ялагдах эрхгүй Ардчилсан нам”, Ж.Баярмаа “Хүчтэй сөрөг хүчнээс чадварлаг Засгийн газар”, Б.Отгонбат “Ардчилал бол Монголын хүч” гэсэн уриаг тус тус дэвшүүлжээ.
Тэгвэл АН-ынхан даргаа сонгосны дараа Г.Занданшатарын Засгийн газарт эвсэл байгуулна гэх яриа улс төрийн хүрээнд өрнөж байгаа. Энэ асуултад дөрвөн нэр дэвшигч өчигдөр хариулт өгчээ.
Тухайлбал,
Нэр дэвшигч Б.Отгонбат: АН өнгөрсөн хугацаанд олон удаа хамтарсан. Үр дүн нь амжилтгүй болсон. Намын чөлөөт дуу хоолой байхгүй болно. Сөрөг хүчин эрх баригч намыг хазаарлаж, хяналт тогтоох ёстой. Хяналтгүй бол хөгжлийн бодлого алдагдана. Хамтарсан Засгийн газарт орохгүй байх ёстой. Ард түмний итгэлийг авах хүртлээ АН ажиллах ёстой.
Нэр дэвшигч Б.Пүрэвдорж: Ард түмнээс авсан саналын хувиа баримталж хамтарвал хамтарсан шиг хамтрах ёстой. Хариуцлага шаардаж ажиллах нь чухал. Саяхны хамтралд АН-аас томилогдсон албан тушаалтнууд шударга нэр хүндтэй ажиллаж чадсан.
Нэр дэвшигч Ж.Баярмаа: Холимог тогтолцоог хэрэгжүүлнэ гэдэг нь холилдож явна гэсэн үг биш. Хамтарсан хоёр нам өөр, өөр үзэл баримтлалтай учраас хамтрал нурсан гэж үзэж байгаа.
Нэр дэвшигч О.Цогтгэрэл: ҮБХ болон бусад намын гишүүдийнхээ шийдвэрийг сонсоно гэсэн хариултыг тус, тус өгчээ.