Баянгол дүүргийнхэн гэж үнэхээр зүдэрчихсэн ард түмэн юм. Нэг насаараа хаан суусан, энэ дүүргийг вант улс шигээ болгосон С.Эрдэнэ вантангаа арайхийн улс төрөөс зайлуултал араас нь түүнээс ч илүү илбэ шидтэй дахин нэг “вантан”-тай болсон нь УИХ-ын гишүүн, “Оргил”-ын гэх Ж.Ганбаатар.

Гадаад чихрээр баяжсан жудаггүй тэрбумтан Ж.Ганбаатар Баянгол дүүргийн хэдэн ахмадуудад барбарис чихрээ тараасаар УИХ-д сонгогдсон цагаасаа хойш “Баярласан хэрээ бархирав” гэгчээр өөрийн хамаарал бүхий бүх хүмүүсээр дүүргийн Засаг даргын тамгын газар цаашлаад Төрийн ордныг хүртэл дүүргэхээр санаархаж эхлэх нь тэр.

Түүний үг үйлдэл бүхнийг яг таг дуурайж, бүр хүн зодож загнаж, орилохыг нь хүртэл тоть шиг давтах болсон Баянгол дүүргийн Засаг дарга Ө.Сумъяабаатар, Эрүүл мэндийн төвийн дарга З.Балдандугар, “Оргил”-ын Ж.Ганбаатар гэсэн гурван хүний ойрын хүмүүс энэ удаагийн НИТХ болон Дүүргийн Иргэдийн Төлөөлөгчдийн хурлын сонгуульд нэр дэвшиж байна. Тухайлбал, Баянголд МАН-аас нэр дэвшиж буй 41 нэр дэвшигчийн 21 нь Ж.Ганбаатарын, 10 нь Ө.Сумъяабаатарын, тав нь З.Балдандугарын хамаарал бүхий хүмүүс байгаа талаар хэвлэл, мэдээллийнхэн бичиж эхэллээ.

Вант улсын хаан Ж.Ганбаатарын хамаарал бүхий этгээдүүдийн зах зухаас дурдвал,

-Ж.Ганбаатарын туслах, “Оргил” компаний ажилтан Шаравнямбуугийн Мөнгөнцэцэг

-Ж.Ганбаатарын үүсгэн байгуулсан “Моннидер” ХХК-ийн Борлуулалтын ажилтан асан Даваашаравын Бат-Оргил

-Үүсгэн байгуулсан “Моннидер” ХХК-ийн Маркетингийн албаны ажилтан асан Баатарын Батзориг

-Ж.Ганбаатарын бизнесийн хамтрагч, “Моннидер” ХХК-ийн Гүйцэтгэх захирал Алтанбаганы хүү Есүхэй

-Ж.Ганбаатарын хэвлэлийн төлөөлөгч асан Ганболдын Баянжаргал

-Ж.Ганбаатарын дотны найз, “Баянгол шинэ өргөө”-гийн захирал асан Галтбаярын дүү Ганзоригийн Даваасүрэн

-Ж.Ганбаатарын зөвлөх Пүрэвтогтохын Өлзийнаран

-Ж.Ганбаатарын томилсон Геологийн төв лабораторийн дарга Дуламсүрэнгийн Мөнхбаатар

-Ж.Ганбаатарын улаан хамгаалагч, Баянгол дүүргийн Засаг даргын орлогч Дагвадоржийн Жаргалсүрэн

-Ж.Ганбаатарын зөвлөх асан Алгаагийн Мөнхбадрал

-“Royal hotel” бизнесийн хамаарлаар холбогддог, найз Ганхүүгийнх нь хүү Ган-Эрдэнэ, бизнесийн хамтрагч Дашрагчаагийн Содномдорж гэх мэтээр уртаас урт жагсаалт үргэлжилж байна.  

Мөн Ж.Ганбаатар өөрийнхөө баруун гарын хүн болох Ө.Сумъяабаатарыг Баянгол дүүргийн Засаг даргаар томилсны дараа Хороон Засаг дарга нарыг бүгдийг нь өөрийн хамаарал бүхий буюу сонгуульд нь Шадар туслах, ухуулагчаар ажилласан, санал авч өгөх үүрэг гүйцэтгэсэн намынхаа этгээдүүдийг томилсон. Эдгээр хүмүүсээ ч энэ удаа дахин урамшуулж дүүргийн ИТХ-д нэр дэвшүүлжээ.

“Эх нь хээр алаг бол хүү нь шийр алаг” гэгчээр тэрбумтан ахынхаа нөмөрт багтаж, “Би цаашдаа УИХ-ын гишүүн, сайд болно. Хэн чинь ч намайг энэ албанаас унагахгүй” хэмээн даналзах болсон Баянгол дүүргийн Засаг дарга Ө.Сумъяабаатар гэгч өөрийн хамаарал бүхий этгээдэд буюу Архангай аймгаар нэгдэж, фракц үүсгэх болсон ангийн анд Г.Мөнхсайхан, н.Баатар, н.Доржзодов нараас гадна дүүрэгтээ хэлтэс, албаны даргаар томилж байсан н.Агваанцэрэн, н.Лхагвабаатар, н.Чойдог нартаа мөн дүүргийн ИТХ-д өрсөлдөх мандат өгч “эрхлүүлжээ”. Г.Мөнхсайхан нь Ж.Ганбаатарыг Уул уурхай, хүнд үйлдвэрийн сайдаар ажиллаж байхад түүний яаманд Төрийн захиргаа, удирдлагын газрын даргаар ажиллаж байсан билээ.

Тэгвэл мөн л муухай ааш аяг, дээрэнгүй харилцаагаараа түмэнд танигдсан Баянгол дүүргийн Эрүүл мэндийн төвийн дарга З.Балдандугар өөрийн хамаатны дүү Ү.Амартүвшин, төрсөн дүү З.Нямгэрэл нараас гадна өрхийн эмнэлгийнхээ тэтгэвэрт гарсан дарга асан н.Батчимэг, н.Жавзан-Орлом, н.Мэндбаяр нарыг мөн нэр дэвшүүлжээ. С.Эрдэнэ вантангаасаа арайхийн салж байсан Баянгол дүүрэг ийнхүү Ж.Ганбаатар вантангийн гар хөл болсон этгээдүүдийг гарт орох нь цаг хугацааны асуудал болов. Чихэр тараагаад сайд, гишүүн болчихдог эрхэм жудаггүй улстөрчийн увайгүй үйлдлийг эрхбиш баянголчууд хазаарлах биз.