Тун удахгүй “BU Airshow 2023” нэртэй Монголын хамгийн том задгай талбайн шоу, фестиваль болох гэж байгаа билээ. Энэ талаар Буянт-Ухаа олон улсын нисэх буудлын дарга Л.Отгонжаргал өнөөдөр мэдээлэл өглөө. Тэрбээр “Энэхүү арга хэмжээг зохион байгуулаад гурван жил болж байна. Анх 2021 онд зохион байгуулж байлаа. Жил бүр шинэлэг байдлаар зохион байгуулж ирсэн.
Харин энэ жилийн хувьд үйл ажиллагаагаа улам өргөжүүлж, онгоцоор нисэх, агаарын эрэн хайх ажиллагаа, шүхрийн үзүүлбэр, хүүхдийн тоглоомын хэсэг зэргээр үргэлжилнэ. Үйл ажиллагаа нь хоёр хэсгээс бүрдэнэ. Үдээс өмнө эйр шоу болно. Үдээс хойш залуусдаа чиглэсэн хөгжмийн фестиваль болно. Үзэгчдийг уйдаахгүйн тулд олон улсад алдартай DJ-ийг урьж оролцуулж байна.
Мөн гадаад, дотоодын алдартай уран бүтээлчдийг нэг дор цуглуулна. Түүнчлэн энэхүү арга хэмжээ нь Засгийн газраас хэрэгжүүлж буй Монголд айлчлах жил болгон зарласан хөтөлбөртэй уялдаж байгаа юм” гэдгийг онцолж байлаа. Мөн зохион байгуулагчдын зүгээс иргэдийн аюулгүй байдал, амар амгалан байдлыг хангах үүднээс хууль хүчний байгууллагатай хамтарч байгаа гэдгээ хэлж байсан юм. Түүгээр ч тогтохгүй явуулын эмнэлгийг ажлуулахын зэрэгцээ түргэн тусламжийн үйлчилгээг хүртэл иргэдэд үзүүлэхийг дуулгаж байлаа.
Цаашид хоолны үйлчилгээ, бие засах газрыг хүртэл шийдвэрлэсэн бөгөөд иргэдийн тав тухыг хангахад бүхий л бололцоог зохион байгуулагчдын зүгээс бэлтгэжээ. Тиймээс Монголын хамгийн том задгай талбайн шоу олон үзүүлбэрээс бүрдэх бөгөөд 0-12 насны хүүхэд, хөгжлийн бэрхшээлтэй иргэдийг хүртэл үнэ төлбөргүй хамруулах аж. Тасалбарын хувьд 30-50 мянган төгрөгийн хооронд худалдаалж байгаа юм байна. Энэ үеэр супер азтанг хүртэл тодруулах ажээ.
BU Airshow 2023 :
- Анх удаа байлдааны МИГ-29 онгоцны үзүүлбэр
- Шүхрийн үзүүлбэр
- Байлдааны онгоцтой танилцах
- Агаарын эрэн хайх ажиллагаа
- Онгоцоор нисэх боломж
- Нисэх салбарын үйл ажиллагаатай танилцах
- Мэргэжил сурталчлах
- Нисэх загварын тэмцээн, үзэсгэлэн, худалдаа
- Жижиг дунд үйлдвэрлэлийн үзэсгэлэн худалдаа
- Хүүхдийн тоглоомын хэсэг
- Нисэхийн музей болон UB art gallery үнэгүй үзэх эрх
- Азтай үзэгч олон олон бэлгийн эзэн
- Гадаадын болон дотоодын алдартай DJ нүүд
- Урлагийн тоглолтоос бүрдсэн 2 өдрийн шоу арга хэмжээ
- 5 сарын 26,27нд Буянт Ухаа олон улсын нисэх буудал