Батлан хамгаалахын сайдын санаачилсан Зэвсэгт хүчний нэгтгэл, анги, байгууллагуудад шаардлагатай чадварлаг хүний нөөцийг бүрдүүлэх, мэдлэг, ур чадварыг нэмэгдүүлэхэд дэмжлэг үзүүлэх зорилготой “Соёл хүмүүжлийн офицер”, “Цэргийн сэтгэл зүйч”-ийг бэлтгэх мэргэшүүлэх сургалт эхэллээ.
“Цэргийн сэтгэл зүйч” бэлтгэх мэргэшүүлэх сургалтад иргэний боловсролын их, дээд сургуулийг сэтгэл судлал, сэтгэл зүйч мэргэжлээр төгссөн цаашид цэргийн сэтгэлзүйн чиглэлээр ажиллах, “Хүний хөгжлийн менежер”-ийн сургалтад Зэвсэгт хүчинд офицер, ахлагчийн албан тушаалд ажилладаг, бакалаврын зэрэгтэй мөн цаашид энэ чиглэлээр ажиллах хүсэл, сонирхолтой залуусыг шалгаруулан тус сургалтад хамруулж байна.
Энэхүү сургалтаар суралцагсад 432 цагийн хичээл судалж, цаашид алба хаагчидтай зохион байгуулах соён гэгээрүүлэх болон сэтгэл зүйн бэлтгэл, хангалтын ажлын зорилго, зорилт, агуулга, арга хэлбэрт нийгмийн шинжтэй инновац нэвтрэхийн сацуу цэргийн алба хаагчдын хөгжил, төлөвшилд өөрчлөлт, анги байгууллагын соёлд шинэ, эерэг хэв маяг, албаны гүйцэтгэлд чанарын ахиц, дэвшил гарч хувь хүн, хамт олны хандлага шинэчлэгдэх юм.
Уламжлал болсон энэхүү сургалтаар мэргэшсэн цэргийн сэтгэл зүйч, болон соёл хүмүүжлийн офицерууд монгол орны зүүн захаас баруун хязгаар хүртэлх Зэвсэгт хүчний ангиудад ажиллаж байна.
