Дундговь, Өмнөговь аймгуудад улаанбурхан өвчний тохиолдол бүртгэгдсэнтэй холбогдуулан тус аймгийн Онцгой комисс Эрүүл мэндийн яамнаас өгсөн зөвлөмжид тулгуурлан сургууль, цэцэрлэгийг цахимд шилжүүлсэн.

Тэгвэл энэ нь хууль бус буюу хууль зөрчсөн асуудал гэдгийг Боловсролын сайд П.Наранбаяр онцолжээ. Тэрбээр, “Эрүүл мэндийн яам, мэргэжлийн байгууллагын гаргасан зөвлөмжийг бид харах ёстой. Нэгдүгээрт, тандалт хий, хоёрдугаарт вакцинжуулалт, гуравдугаарт ариутгалаа хий гэсэн зөвлөмж гаргасан болохоос сургуулиа хаа, цахимд шилжүүл гэсэн чиглэл өгөөгүй.

Тиймээс хууль зөрчсөн учраас сургууль, цэцэрлэгээ хэвийн явуул гэсэн чиглэл өгсөн. Бие даалтын долоо хоног бол гамшгийн эсрэг долоо хоног гэж явна. Хөдөө орон нутагт хоёр долоо хоног амралт явагдана. Гамшгийн хэмжээнд хүрсэн үү, үгүй юу гэдгийг тогтоож, вакцинжуулалтын явцыг харсны дараа цахимд шилжүүлэх эсэх асуудал яригдана” гэв.