Засгийн газрын өнөөдрийн хуралдаанаар хэлэлцсэн асуудлын талаар ЗГХЭГ-ын дарга Н.Учрал мэдээлэл өгөв. Тодруулбал, Засгийн газраас Стандартын хуулийг УИХ-д өргөн мэдүүлэхээор болжээ. Одоогоор 180 стандартыг хувийн хэвшилд илүү хүнд суртал үзүүлж байна гэж үзэж цуцалсан хэмээлээ. 

Н.Учрал сайд хэлэхдээ "Зөвшөөрлийн хуулийг давуулсан сайд болон Засаг дарга нарын захиргааны хэм хэмжээг таслан зогсоох ажлын хүрээнд нийт 50 гаруй захиргааны хэм хэмжээг хүчингүй болголоо. Төр өөрт байгаа мэдээллийг иргэнээс нэхдэг байдал анхан шатанд их байгаа нь иргэдээс ирсэн гомдол мэдээлэлд их дурдагдсан байна.

Өнөөдрийн байдлаар 170 зөвшөөрлийг бүрэн цахимжуулсан байтал анхан шатан дээр цахимд байгаа баримт бичгийг цаасаар шаарддаг хэвээр байна. Одоогоор 60 зөвшөөрөл л бичиг баримт шаардахгүй байгаа учраас аймаг, нийслэлд зөвшөөрөлд хүнд суртал үүсгэхгүй байх талаар холбогдох арга хэмжээ авахыг үүрэг болгосон. 

Зөвшөөрлийг өгөхдөө хүнд суртал үүсгэж өгдөг ч явцын хяналт нь байдаггүй. Стандарт гэж зүйл Монгол Улсад байхгүйтэй холбоотой гэж Засгийн газар үзсэн учраас Стандартын тухай хуулийг УИХ-д өргөн мэдүүлэхээр болсон. 

6733 стандарт байгаа ч иргэд, аж ахуйн нэгж тэр бүр мөрддөггүй. Мөн олон улсад болон бүс нутагт мөрдөгддөг стандартыг шууд авч хэрэглэх хууль эрхзүйн орчин байдаггүй. Судалгаагаар 180 стандарт хувийн хэвшилд илүү хүнд суртал үүсгэж байна гэж гарсан учраас цуцалсан байна. Тиймээс дүрэм журмын түгжрэлийг тайлж, олон улсад хүлээн зөвшөөрөгдсөн эрүүл аюулгүй стандартыг мөрдөхийн тулд Стандартын хуулийг баталж мөрдүүлнэ. Мөн Зөвшөөрөл, мэдэгдлийн тухай хуулийн төслийг УИХ-д өргөн мэдүүлнэ. Ингэснээр үйлчилгээ явууллаа гэдгээ мэдэгдээд шууд үйл ажиллагаа явуулах эрхзүйн орчин бүрдэж байна" гэлээ.