Ерөнхий сайд Л.Оюун-Эрдэнийн зүгээс АТГ-ын дарга З.Дашдавааг улираан томилох санал оруулж ирснийг өчигдөр, өнөөдөр холбогдох байнгын хороод болон бүлгээр хэлэлцэн дэмжлээ. З.Дашдаваа дарга хэлэхдээ "Ерөнхий сайд намайг авлигатай тэмцэх ажилд цаашдаа тууштай ажиллаж чадна гэж үзсэн учраас улираан томилж байгаа хэрэг. Авлигын индекс өнгөрсөн хугацаанд буурсан. Цаашдаа ч бууруулж чадна" хэмээжээ. 

Тэрбээр, өмнө нь хэвлэлд өгсөн ярилцлагадаа “Манай мөрдөн шалгах ажиллагааны явцад нөхөн төлүүлж буй хөрөнгө мөнгө хохирогчдод очдог. Хохирогч хэн байдаг вэ гэвэл зарим тохиолдолд төрийн өмчит компаниуд, улсын дансанд ордог. Гэмт хэргээс хурааж авсан хөрөнгийг хэрхэн ашиглахыг заах эрх АТГ-т байхгүй” гэж хэлсэн байдаг. Эндээс үүдээд АТГ хэдий хэр хөрөнгө нөхөн төлүүлсэн, улсад буцаасан, хохирогчдод шилжүүлсэн тухай мэдээллийг сөхөж үзлээ.

АТГ-ын мөрдөгчид 2020 оноос өнөөг хүртэл зөвхөн гадаад улсаас гэхэд л 13.9 сая ам.доллар буюу 50 гаруй тэрбум төгрөгийн хулгайлагдсан хөрөнгийг буцаан авчирчээ. Үүнээс гадна дотооддоо авлигын гэмт хэргийн улмаас учирсан хохирлын нийт 2.6 их наяд төгрөгийг 2019-2024 оны хооронд улсад нөхөн төлүүлсэн байна. Үүнийг он оноор задалж үзвэл:  

2019 онд 11.3 тэрбум төгрөг

2020 онд 35.6 тэрбум төгрөг

2021 онд 96.2 тэрбум төгрөг

2022 онд 2.3 их наяд төгрөг

2023 онд 238.6 тэрбум төгрөг

2024 онд 240.9 тэрбум төгрөг

Ингэхээр гадаад, дотоодоос хурааж улсын төсөвт оруулсан нийт мөнгөн дүн 3.4 их наяд төгрөг болж байгаа юм байна. АТГ-ын даргаар З.Дашдаваа очсоноос хойш энэ чиглэлийн ажил эрчимжсэн гэхэд хилсдэхгүй. Он, оны статистикаас харахад 2022 онд хамгийн их хэмжээний буюу 2.3 их наяд төгрөгийн хохирол нөхөн төлүүлжээ.

Бусад онуудад 96.2 тэрбум, 240.9 тэрбум гэхчлэн тэрбумаар хэмжигдэж байхад 2022 онд нөхөн төлүүлсэн хохирлын хэмжээ их наядаар тооцогдож байгааг тодруулж үзэв. Тухайн жилд Хөгжлийн банкны, Дарханы төмөрлөгийн, Эрдэнэт үйлдвэрийн гээд томоохон хэргүүд шалгагдаж шийдэгдсэн ажээ. АТГ-ын нэг онцлог нь авлигын гэмт хэргийг мөрдөн шалгаад прокурор, шүүх рүү шилжүүлээд орхих биш тухайн гэмт хэргээс учирсан хохирлыг нөхөн төлүүлэхийг хуулийн бүх боломжит хүрээнд эрмэлзэж ажилладаг. Тийм учраас 2022 онд авлигаас учирсан 2.3 их наяд төгрөгийг барагдуулж чаджээ. Энд бас нэг сонин асуулт гардаг. Тэр мөнгийг АТГ хаана хадгалдаг вэ гэх асуулт.

Тэгвэл АТГ хадгалаад байдаггүй юм байна. Авлигын хэрэг хаана үйлдэгдсэн буюу авлигын хэрэг үйлдсэн этгээдийн хулгайлсан газарт буцаадаг юм байна. Гэхдээ энийг АТГ шийддэггүй. УИХ, Засгийн газрын шийдвэрээр шилжүүлдэг гэсэн үг. Жишээ нь 2022 онд нөхөн төлүүлсэн 2.3 их наяд төгрөгөөс 861 тэрбумыг нь Хөгжлийн банк руу, 721 тэрбумыг Дарханы Төмөрлөгийн үйлдвэрт, 235 тэрбумыг Хөтөл цемент шохой руу, 647 тэрбум төгрөгийг Эрдэнэт үйлдвэрт гэх мэтээр шилжүүлсэн байна.